Çim Peka, gazetari që sfidoi portalet dhe po drithëron televizionet tradicionale

SYRI TV është televizioni më i ri që pritet të nis në muajin janar. Drejtori i Syri.net,  Çim Peka, në një intervistë për “Koha Jonë” tregon detaje dhe risitë që ky projekt pritet të sjellë në tregun mediatik.  “Suksesi që ka patur SYRI.net në 4 vite që prej hapjes e bëri të domosdoshme hapjen edhe të një ‘syri’ tjetër, këtë herë televiziv për ta bërë punën hulumtative të gazetarëve tanë sa më të pranishme edhe për publikun e cili jo medoemos përdor platformat online për të informuar”,- shprehet Çim Peka.

Keni paralajmëruar se “shihemi në janar me një stacion te ri televiziv Syri TV”. Bile nënteksti ishte provokues dhe sfidues për televizionet e tjera tashmë kombëtare dhe tradicionale. Është thjesht marketing, që prapë pranohet, apo do jetë televizion që do konkurrojë realisht të tjerët, duke qenë investigues?

Çim Peka: SYRI TV është një projekt i imponuar nga dy rrethana tejet përcaktuese. E para dhe besoj më e rëndësishmja ka të bëjë me represionin të cilit i janë nënshtruar sidomos në vitet e fundit, media vizive në Shqipëri. Fatkeqësisht, ajo që po ndodh me median në Shqipëri është në kufijtë e nënshtrimit që vjen si pasojë e presionit, miklimit me para publike dhe nevoja e qeverisë për të mbyllur gojët e pakta që ngrenë zërin kundrejt abuzimeve të panumërta që ajo prodhon çdo ditë. E dyta, suksesi që ka patur SYRI.net në 4 vite që prej hapjes e bëri të domosdoshme hapjen edhe të një ‘syri’ tjetër, këtë herë televiziv për ta bërë punën hulumtative të gazetarëve tanë sa më të pranishme edhe për publikun e cili jo medoemos përdor platformat online për të informuar. Investigimi, publikimi i informacioneve sensitive e të tjera si këto është në ADN-në e SYRI-t, kështu që i vetmi ndryshim është se tashmë për të bërë atë që dimë të bëjmë më mirë, nuk do të përdorim 1, por dy “sy” për të parë e për t’ia përcjellë publikut atë çdo ditë mediat pro-qeveritare mundohen ta fshehin!

Ky optimizëm zakonisht kap çdo themelues të një media të re. Pyetja mbetet: a keni staf me emër të konsoliduar që do t’i konkurroni apo do fusni brez të ri në gazetarinë televizive?

Çim Peka: Ne nuk jemi as optimistë, as entuziastë, por qartazi realistë. Media nuk është më shumë çështje emrash sesa çështje e vullnetit të atyre që punojnë në të për të bërë punën e tyre në shërbim të interesit publik. Unë mund t’iu siguroj juve si media dhe lexuesin e tuaj, se publiku nuk e njeh 90% të gazetarëve dhe punonjësve të portalit SYRI.net, por janë po këta gazetarë “të panjohur” që me punën e tyre prej 4 vitesh e kanë bërë portalin tonë më të lexuarin në vend. SYRI TV është vijimi i këtij modeli modestie, por përkushtimi ndaj të vërtetës dhe interesit më të mirë publik. Gazetarët e ofruar deri tani në redaksinë tonë gjithsesi janë profesionistë të padiskutueshëm, së pari sa i takon integritetit të tyre, e së dyti në njohjen e hollë që kanë në raport me fushat që mbulojnë. Ambrozia Meta është një gazetare që 3 vite më parë ishte një emër i panjohur për publikun, por të gjithë e dinë tashmë nervin e saj veçse profesional për tu përballur me aktorët politik pa dallim logoje politike. Prej disa muajsh ajo është pjesë e SYRI TV. Drejtuesi i lajmeve Bled Koka, Moderatoret Klaudia Karabolli, Armela Ferko e Bledar Marku mund të konsiderohen pa frikë si figurat e freskëta të përçimit të lajmit me profesionalizëm dhe dinamikën e nevojshme që i nevojitet SYRI-t. Kryeredaktorët Ilir Hoxha dhe Romir Saraçi janë padiskutim dy emra personalisht për mua me kontribut të padiskutueshëm në median shqiptare, dhe sot në timonin e SYRI TV, ata janë garancia se ekrani ynë do të jetë vazhdimësia e kulturës më të mirë të përcjelljes së lajmit me profesionalizëm e sa më në kohë reale, duke qenë se formati ynë do të jetë informative.

 

Dita e enjte si rregull quhet se është “pushtuar” nga “musketjerët” mediatikë si Blendi Fevziu, Sokol Balla, Eni Vasili dhe Artur Zheji. A keni ndonjë “musketjer” nën mëngë që do shfaqet te Ju apo të enjten do ta dorëzoni të sipërpërmendurve?

Çim Peka: Duke rezervuar vlerësimin maksimal për secilin prej emrave që përmendët me sipër, me lejoni t’ju kujtoj se puna e medias nuk është vetëm dita e enjte nga ora 21.00 deri ne 23.00. Duke rezervuar të drejtën e surprizës për javët në vazhdim, më lejoni të theksoj se emisioni “Çim Peka Live” do të jetë i pranishëm në SYRI TV 3 herë në javë. Nëse SYRI TV do të ketë ndonjë “musketier” në radhët e saj kjo mbetet për tu parë, por ajo që ju garantoj është se në ekranin tonë e sigurtë është nuk do të ketë asnjë “Kardinal Rishelje”!

Televizioni juaj do jetë në linjën editoriale të portalit syri.net apo do jetë linjë tjetër editoriale?

Çim Peka: Linja editoriale e SYRI-t do të jetë e njëtrajtshme, qartazi opozitare. Është ajo që thashë në nisje të kësaj interviste, nga 1 tani do të kemi 2 “SY”!

Nëse thuhet investimi për këtë media televizive a është në përmasat e investimeve që kanë bërë televizionet e sotme të tjera private kombëtare apo me “xhepa me të lehtë”?

Çim Peka: Ne nuk jemi të pasur, por jemi të vetëdijshëm se zhvillimi i teknologjisë të lejon që të bësh investime të vogla për një cilësi sa më të madhe. Investimi më i rëndësishëm për të cilin nuk do të “kursehemi” është ai në burime njerëzore të cilët besojnë, kërkojnë dhe duan të zhvillojnë një gazetari cilësore.

Në cilën platformë do shikohet televizioni i ri dhe prapë nëse mund të na thoni emrin e drejtorit të ri të televizionit?

Çim Peka: Drejtimi i Televizionit do të jetë modeli i menaxhimit përmes një bordi vendimmarrje pjesë e të cilit tashmë prej pak ditësh është edhe gazetari i shquar Andi Bejtja. Televizioni momentalisht është pjesë e paketës dixhitale të TVSH-së dhe të Tring.

KOHA JONË, 5 NËNTOR 2019