Ish-zv.presidenti i socialistëve europianë: Edi Rama sillet si “bosi i madh”

Për opinionin publik dhe studiuesit e marrëdhënieve ndërkombëtare në Holandë, refuzimi i hapjes së negociatave me Shqipërinë dhe Maqedoninë e Veriut nuk lidhet vetëm me euroskepticizmin, por edhe me reformat e munguara në këto vende dhe gjithë Ballkanin.

Jan Marinus Wiersma, drejtues i Institutit për Marrëdhënie Ndërkombëtare “Clingendael”, në Holandë dhe ish-deputet i Parlamentit Europian dhe ish-zëvendëspresidenti i grupit të Partisë Socialiste Europianë (PSE) thotë se në vendet e BE ka hezitim të fortë për të pranuar lider autoritarë si Edi Rama dhe Aleksandër Vuçiç. Në një intervistë për EWB  (European Western Balkans) Jan Marinus Wiersma shprehet se BE nuk do që të ketë brenda saj, në të ardhmen, liderë të tjerë problematikë siç ka ndodhur me Poloninë dhe Hungarinë.

Duke bërë një krahasim për përfaqësuesit politikë të rajonit, eksperti dhe ish-deputeti i Holandës thotë se në rajon, Aleksandër Vuçiç njihet si lider autoritar, po ashtu dhe presidenti i Malit të Zi, ndërsa për Edi Rama shton se është “bosi i madh” në Shqipëri. Ai shton se duhet një kontroll më i rreptë për këto vende në procesin e integrimit.

Nëse i hidhni një sy rolit të Presidentit Vuçiç këtu në Serbi, ai është disi autoritar edhe  Gjukanoviç në Mal të Zi. Edi Rama është gjithashtu një “bos i madh” në Shqipëri dhe unë mendoj se Zaev ka një profil disi të ndryshëm. Kështu që unë e kuptoj që ekziston një hezitim i caktuar për të pranuar këtë lloj liderësh në BE, ku ne kemi tashmë probleme me të tjerë”,- thotë Jan Marinus Wiersma.

Ai justifikon qëndrimin e presidentit të Francës si një masë që në BE të mos shtohen liderë, si ai i Hungarisë dhe Polonisë. “Argumenti i shtuar tani dhe kjo është gjithashtu ajo që unë mendoj se po luan një rol në motivimin e Presidentit Macron, është se ne nuk duam të marrim në BE vendet që më pas fillojnë të sillen si Orban në Hungari ose Kaczynski në Poloni. Kjo është një frikë shtesë, duke pranuar dy ose tre vende mund të kenë një ndikim shqetësues”,- thotë Jan Marinus Wiersma.

Eksperti holandez sugjeron se BE duhet të jetë me agresive ndaj liderëve të tillë dhe elitave që ata përfaqësojnë. “Unë mendoj se duhet të jemi më agresivë si Bashkimi Europian në këto negociata, ky është roli i Komisionit Evropian. Ne duhet të jemi më agresivë ndaj elitave të vendeve kandidate dhe të mos i lejojmë ata të largohen. Kjo është e vetmja gjë që duhet të bëjmë, monitorimi dhe shqyrtim që ata përmirësohen. Gjithashtu, mbase duhet të ketë më shumë investime që duhet të çojnë drejt demokracisë dhe shtetit të së drejtës, si një dimension shoqëror”,- thotë Jan Marinus Wiersma.

Eksperti holandez shton se situatat politike në vendet e Ballkanit me bojkotet e parlamentit dhe kriza nuk kanë ndikuar pozitivisht në BE. Ai shton se Parlamenti Europian duhet të përfshihet në mënyrë më direkte në zgjidhjen e këtyre krizave.