“Prioritet i qeverisë është largimi nga BE-ja më 31 tetor” Mbretëresha Elizabetë çel sesionin parlamentar në Britani

Mbretëresha Elizabetë e Mbretërisë së Bashkuar e ka filluar fjalimin e saj në Pallatin Mbretëror duke thënë se prioritet i qeverisë britanike gjithmonë ka qenë largimi i Britanisë së Madhe nga Bashkimi Evropian më 31 tetor.

Sidoqoftë, ajo ka theksuar se qeveria e dëshiron një marrëdhënie të re bashkëpunuese me Bashkimin Evropian, e cila do të jetë e ndërtuar mbi themelin e tregtisë së lirë

Mbretëresha njoftoi edhe për ndryshimet që do të ndodhin pas largimit të vendit nga BE-ja. Kështu, do të ketë rregullore të reja për peshkatarinë dhe bujqësinë dhe do të futet në fuqi një ligj i ri për imigrimin, duke i dhënë fund lirisë së lëvizjes.

Ajo shtoi se plani i ri ekonomik i qeverisë britanike do të jetë i mbështetur në një strategji të re fiskale. Sipas saj, do të ketë edhe reforma në sistemin e kujdesit social për personat e rritur.

Tutje, mbretëresha tha se qeveria është e përkushtuar për mbrojtjen e mjedisit. Do të ketë masa për përmirësimin e cilësisë së ajrit dhe ujit dhe promovimin e mirëqenies së kafshëve, shkruan “The Guardian”./Gazeta Express