Perimet që largojnë fryrjen e stomakut

Nëse ka këshillë që pranohet nga të gjithë ekipet e ekspertëve është që njeriu duhet të hajë sa më shumë perime. Zakonisht, ekspertët janë të ndarë për vlerat dhe kundërvlerat e yndyrnave apo karbohidrateve, por kur vjen puna tek perimet të gjithë bien dakord se ato janë një nga bazat e një regjimi të shëndetshëm ushqimor. Perimet përmbajnë shumë fibër. Gratë, sipas ekspertëve, duhet të konsumojnë të paktën 25 gramë fibër në ditë. Një racion me brokoli ofron 4 gramë fibër. Kjo tregon qartë sa shumë perime duhet të konsumojë njeriu në ditë për të plotësuar nevojën për fibër. Nga ana tjetër, fibra ka edhe një efekt anësor që manifestohet më qartë tek disa njerëz. Ngrënia e perimeve ka raste që shkakton fryrje në stomak. Për të minimizuar problemet me stomakun, të dhënat të cilave u referohet AgroWeb.org rekomandojnë përfshirjen graduale të perimeve në regjimin ushqimor.

Kastraveci

Kastraveci ofron shumë vitamina dhe antioksidantë. Nga ana tjetër kastraveci nuk përmban shumë fibër, ndaj gjasat për fryrje në stomak janë minimale. Për më tepër, kastraveci është hidratues për organizmin.

Ashparg

Ashpargu përmban një amino acid që e ndihmon organizmin të largojë lëngjet e tepërta dhe fryrjen. Megjithatë, me shpargun duhet të tregoni kujdes me sasinë. Nëse e teproni, do të përballeni me fryrjen në stomak.

Avokado

Avokadoja është e pasur me kalium dhe rekomandohet në rastet kur e keni tepruar me kripën dhe ndiheni të fryrë. Avokadoja përmban yndyrna të shëndetshme. Këto yndyrna e ndihmojnë trupin të përthithë ushqyes të tjerë.

Kungujt e njomë

Shumë perime përmbajnë sheqerna dhe karbohidrate që shkaktojnë gazra dhe fryrje. Kungujt e njomë kanë më pak nga këto përbërës, ndaj konsiderohen idealë.

Barishtet

Barishtet dhe spinaqi në veçanti përmbajnë shumë vitaminë B që largon ndjesinë e fryrjes. Barishtet konsumohen të kavërdisura me vaj ulliri dhe limon ose në sallata.

Lakra turshi

Lakra turshi është e shëndetshme për stomakun dhe përmban shumë probiotikë. Sigurohuni që ta përgatisni vetë në shtëpi për një rezultat më të mirë dhe kujdes me sasinë.

Domatet

Domatet janë të pasura me antioksidantë dhe konsiderohen një perime që nuk shkakton fryrje. Megjithatë, reagimi ndaj domates varet nga organizmi i njeriut dhe shëndeti i stomakut. /AgroWeb/