Sa herë u trondit vendi ynë pas tërmetit 5.8 ballë? Lëkundje gjatë gjithë natës, paniku vijon

Pasojat e tërmetit të 21 shtatorit në Tiranë

Vendi ynë është lëkundur plot 17 herë nga tërmetet e forta, prej pasdites së djeshme në orën 16:04. Tërmeti i parë ishte dhe më i fuqishmi dhe më i tmerrshmi, me një magnitudë 5.8 ballë të shkallës Rihter.

Ky tërmet shkaktoi dëme të mëdha në Durrës dhe Tiranë, duke shkatërruar mbi 100 banesa dhe 7 pallate, si dhe duke lënduar me dhjetëra qytetarë. Pas kësaj lëkundjeje dramatike, që shkaktoi panik e tmerr te qytetarët, lëkundjet kanë vijuar gjatë gjithë kohës, por me magnitudë më të vogël.

Një tjetër tërmet i fortë u shënua dhe në mesnatë pak pas orës 00:00, me magnitudë 5 ballë, ndërsa lëkundje të tjera të forta janë shënuar gjatë natës, duke bërë që shumë qytetarë të kalojnë natën jashtë.

Epiqendra e tërmeteve ishte në Detin Adriatik, me një thellësi jo shumë larg qytetit të Durrësit, ndaj dhe pasojat më të mëdha kanë qenë në qytetin bregdetar.