Vokshi i përgjigjet Gjonajt: Është dhomë teke, gjithë delegacionin nuk e nxinte aty

Në një të ashtuquajtur, “sqarim publik” ministrja e Drejtësisë, Etilda Gjonaj u përgjigj ndaj akuzave se kishte pronotuar gjatë një vizite zyrtare 700 euro për një natë në hotel, duke i hedhur poshtë me argumentin se është ndërmarrë një sulm ndaj saj.

Ish-deputetja demokrate, Albana Vokshi ka reaguar lidhur me deklaratat e Gjonajt duke thënë se faturat janë të shkruara e zeza mbi të bardhë, ndërsa ka publikuar edhe dokumentet që e provojnë këtë gjë.

Reagimi i plotë:

Reagimi i Etilda Gjonit për hotelet luksoze me çmime sheikësh, ku qendron gjatë vizitave zyrtare, tenton të bëjë shqiptarët për budallenj.

Faturat janë të shkruara e zeza mbi të bardhë.

Dhoma e luksit me 700 euro nata:

  1. Është në emrin e Ministres së Drejtësisë, Etilda Gjonaj.
  2. Është dhomë teke.
  3. Është dhomë e paguar për 1 person, ku, normalisht, nuk mund të gjente strehë gjithë delegacioni, siç mashtron ministrja e Edi Ramës.

Edhe kontrollin e brendshëm e ka porositur sa për të larë duart me opinionin publik, që e refuzon luksin e qeverisë së vendit më të varfër në Europe! Askush nuk e ka detyruar Etildën të zgjedhë hotele me 5 yje gjatë vizitave të saj, vizita të cilat nuk rezultojnë në kohë bumi turistik, që Etilda të mos gjejë një dhomë të zakonshme, pa shumë luks dhe komoditete të tjera speciale.

Dhe, së fundi, zonja ministre e një qeverie hajdute gënjen edhe për kohën e publikimit të lajmit, i cili është shpërndarë parmbrëmë, jo para 24 orësh, siç përpiqet të mashtrojë Etilda, në mënyrë që të justifikojë heshtjen e gjatë për shpenzimin e parave publike si t’i kishte fituar në bixhoz.