Hajdari për Pjetrin: Problemi nuk qëndron te individi

Rudina Hajdari thotë se çështja e Valdrin Pjetrit, vërteton për të disatën herë se sa i korruptuar dhe i dështuar është sistemi ynë politik. Sipas saj, fakti që një person me rekorde kriminale vendoset për të marrë postin e kryebashkiakut të Shkodrës, nuk është problem i individit por problemi qëndron te liderët partiakë.

“Një individ me të kaluar kriminale vendoset si përfaqësues i Partisë Socialiste për të marrë postin e Kryetarit të Bashkisë në qytetin e Shkodrës. Problemi nuk qëndron tek individi, sa tek liderat partiakë që promovojnë figura të pista në pozicione të larta drejtuese apo sistemi i kalbur politik që lejon pseudo-liderat partiakë të tallen me qytetarët shqiptarë. Ajo që është akoma dhe më shqetësuese është se nuk ekziston një alternativë për qytetarët, një figurë politike që t’i besojnë, pasi fatkeqësisht u është mbushur mendja se të gjithë janë njësoj. Kanë humbur besimin tek kjo kastë politike që sheh vetëm interesin personal, duke e lënë në harresë interesin publik. Qytetarët shqiptarë janë të distancuar komplet dhe nuk reagojnë edhe kur ndodhin ngjarje të tilla absolutisht të papranueshme, për një vend që aspiron futjen në BE, pasi u ka vdekur shpresa”.