Ja çfarë deklaronte Rama për Valdrin Pjetrin kur e zëvendësoi me Ditmir Bushatin

Kryeministri Edi Rama bën një hap pas dhe “lëshon” Valdrin Pjetrin, të cilit pasi i besoi drejtimin e bashkisë së Shkodrës i kishte besuar edhe Partinë Socialiste të këtij qyteti.

Deri para pak ditësh detyra e drejtuesit të qarkut socialist të PS-së mbahej nga Ditmir Bushati, por në mbledhjen e fundit të Asamblesë Kombëtara, Rama njoftoi ndryshimin.

“Vendosja e Valdrinit drejtues aty është gjëja e duhur”, deklaronte “i lumtur” Rama para gazetarëve më 30 korrik.

Ndërsa kanë kaluar vetëm dy javë nga këto qëndrime, sot, vetëm pak orë pasi Partia Demokratike publikoi dokumentin e Kuesturës së Firences përmes një reagimin në rrjetet sociale, Rama distancohet dhe shkruan se deri në zbulimin e së vërtetës, Partia Socialiste dhe Valdrin Pjetri i kanë rrugët e ndara.

Asambleja Socialiste

Në Asamblenë Kombëtare të mbledhur në Pallatin e Kongreseve më 23 korrik 2019, Rama bëri të ditur largimin e Ditmir Bushatit nga drejtimi i qarkut të Shkodrës.

Rama u shpreh se ky ndryshim vinte si nevojë për të përmirësuar drejtimin politik në Shkodër.

Edi Rama:  Duke ndjerë nevojën për të përmirësuar drejtimin politik në Qarkun e Shkodrës, Qarkun do e drejtojë kryetari i ri i Bashkisë së Shkodrës.

Pas kësaj deklarate të Ramës, ish-ministri i Jashtëm Ditmir Bushati në një prononcim për gazetarët deklaroi se: Nuk ka rëndësi të jem me post apo pa post. E rëndësishme është për çfarë çështjesh luftoj dhe pikëpamjesh mbroj. Të jeni të bindur se mungesa e oficit më bën të jem më i vendosur për të çuar përpara idetë për të ardhmen tonë”.

Ndërsa gjatë një bashkëbisedimi me gazetarët ( 30 korrik 2019), kryemninistri Edi Rama u shpreh:

“Duhet një person çdo ditë e çdo natë aty. Unë dua që në fund të 4 viteve të Valdrinit, ata që shkojnë në Shkodër të kenë impaktin që kanë në Vlorë”, do të deklaronte Rama.