Boçi për “KJ”: S’ka përçaje të opozitës, zgjedhjet me qeveri tranzitore

Nga: Redjon Shtylla

Gjykatat po njohin dita-ditës kryebashkiakët e dalë nga votimet njëpartiake të 30 qershorit, kurse PD-ja thotë se kryebashkiakët e djathtë nuk do të dorëzojnë mandatin. PS nuk e pranon 13 tetorin e dekretuar nga Presidenti i Shqipërisë, Ilir Meta si datë për zgjedhjet lokale, kurse nga ana tjetër, PD-ja po prezanton platformën për ekonominë. Si do të zgjidhet ky ngërç?

“Koha Jonë”, kontaktoi me ish-deputetin e PD-së, Luçiano Boçin, i cili që në fillim thotë se 30 qershori është krejt nul dhe dekreti i Presidentit për 13 tetorin në fuqi. Ai përmend situatën në gjykatën e Durrësit, ku thekson se: “Skandali i Durrësit dëshmoi qartazi që sot sistemi i drejtësisë është nën vasalitet politik të plotë. Gjyqtarët janë nën presion të plotë dhe vendimit e tyre vazhdojnë të jenë partiake dhe jo ligjore. Në të tilla rrethana por dhe ato pararendëse që lidhem me dekretin e Presidentit, kryebashkiakët nuk mund të largohen nga ushtrimi i detyrës. 30 Qershori është krejt nul dhe dekreti i Presidentit në fuqi. Është e drejtë institucionale e kryebashkiakëve të vazhdojnë të qëndrojnë në detyrë dhe madje të angazhohen për situatën zgjedhore”. Boçi akuzon se PS vazhdon në harbuterinë e saj ligjore duke i vënë minat çdo ligji e institucioni në Shqipëri.

I pyetur pse PD-ja ka nisur tani të shpalosë programin e saj për ekonominë, Boçi thekson se është garancia më e prekshme për zgjidhjet që sot kërkojnë qytetarët për problemet e tyre të mprehta ekonomike e sociale. “Prezantimi i platformës ekonomike është jo thjesht pararendësja e programit të PD për zgjedhjet politike të prakohshme por dhe garancia më e prekshme për zgjidhjet që sot kërkojnë qytetarët për problemet e tyre të mprehta ekonomike e sociale”.

A është në uniformë opozita dhe e ndajnë të njëjtin qëndrim për situatën politike? Ish-deputeti thotë se nuk ka çarje në qëndrimet e opozitës, ku thekson se zgjedhjet lokale dhe politike do të kalojnë përmes një qeverie tranzitore. “Opozita nuk ka çarje në qëndrimin e saj. Ne vazhdojmë të theksojmë që zgjedhje me Ramën nuk ka dhe që zgjedhjet politike e lokale do të kalojnë nëpërmjet një qeverie tranzitore”. Sipas tij, dinamika politike është në lëvizje edhe pse jemi në pikun e sezonit turistik. “Dinamika politike pavarësisht stinës është në lëvizje të vazhdueshme dhe zgjidhja e krizës është e afërt. Ne kemi ende në dispozicion mjete politike për të detyruar një zgjidhje që sot e kërkojnë 85 % e shqiptarëve”.