Shqiptarët ngrihen në protestë të premten: Unë marshoj sepse statusi në Facebook nuk ndryshon botën

Këtë të premte në orën nga ora 11:00 deri në orën 13:00 është paralajmëruar se do të protestohet.

Në një postim në rrjetet sociale bëhet e ditur se  mosmiratimi i Vendimit te Këshillit të Ministrave në zbatim të këtij nenit 95 ka shkaktuar pasoja negative në mijëra familje të varfra.

Neni 95, i ligjit 43 “Për sektorin e energjisë elektrike” siguron të drejtën themelore të familjeve për ndriçim, informim, standard minimal të jetesës dhe lehtësira të tjera në kuadër të aksesimit të energjisë elektrike, veçanërisht grupeve vulnerabël përfshirë dhe pakicat Rome dhe Egjiptiane.

Ndaj aktivistë të pakicave Rome dhe Egjiptiane, së bashku me disa prej familjeve të varfra kanë ndërmarrë hapin që ditën e premte të ngrihen në protestë.

Në postimin në rrjetet sociale bëhet thirrje që të marrin pjesë të gjithë qytetarët.

Protesta do të zhvillohet përpara godinës së Kryeministrisë dhe Ministrisë së Shëndetësisë dhe Mbrojtjes Sociale.

Po ashtu në postimin në fjalë shkruhet:

Kemi ndërmarrë disa veprime për të vënë në lëvizje institucionet përgjegjëse për zgjidhjen e këtij problemi. Pavarësisht përpjekjeve tona të vazhdueshme dhe të shtrirë në kohë, ende nuk është siguruar marrja e masave konkrete për zgjidhjen e problemit, ndaj ndihemi të detyruar të përshkallëzojmë reagimin tonë përmes një proteste e cila do të zhvillohet më datë 19.07.2019, ditë e Premte, ora 11:00 – 13:00, përpara godinës së Kryeministrisë dhe Ministrisë së Shëndetësisë dhe Mbrojtjes Sociale.’’

Pritet që slogani kryesor i kësaj proteste të jetë:

Unë marshoj sepse statusi në Facebook nuk ndryshon botën.’’