Ferdinand Poni, “Nderi i Qytetit” të Beratit

Këshilli Bashkiak i Beratit i akordoi sot Ferdinand Ponit, pas vdekjes, titullin “NDERI I QYTETIT” të Beratit.

Në ceremoninë e zhvilluar  në sallën e konferencave të Bashkisë merrnin pjesë përfaqësues të institucioneve vendore, të forcave politike, intelektualë, të afërm të familjes Poni, qytetarë etj. Ishin të pranishëm gjithashtu anëtari i Kryesisë së PD-së, Eno Bozdo, ish-Prefekti i Beratit, Roland Bejko, ish – Ministri i Brendshëm, Agron Musaraj, Presidenti i Nderit i PDIU – së, Tahir Muhedini, kolegë dhe bashkëpunëtorë të Ferdinand  Ponit në organet drejtuese të PD – së, të pushtetit qendror dhe atij lokal.

Titulli ju dha me motivacionin; Për kontributin e tij të shquar në funksionimin e qeverisjes vendore, sistemeve elektorale, organizimin e zgjedhjeve, hartimin e politikave në fushën e administrimit publik, territorit dhe autonomisë vendore; si një nga nëpunësit e lartë të shtetit shqiptar, për kontributin e tij të çmuar në lëvizjen opozitare dhe pluripartiake në vendin tonë dhe si qytetar i denjë i Beratit, që gezon respektin e qytetarëve të tij.

Pas paraqitjes të biografisë, veprimtarisë politike dhe shoqërore të Ferdinand Ponit, si dhe të disa sekuencave nga jeta familjare, drejtuesi i kësaj ceremonie, Kadri Kuka, fton Kryetarin e Bashkisë, Petrit Sinaj dhe Nënkryetaren e Bashkisë, znj. Afize Skëndo, t’i dorëzojnë bashkëshortes së tij, Merita Poni, titullin e akorduar nga Këshilli Bashkiak Berat.

Në fjalën e tij të rastit, Kryetari i Bashkisë, Petrit Sinaj, vlerësoi kontributin e çmuar të Ferdinand Ponit si një nga protagonistët kryesor të lëvizjes opozitare për vendosjen e pluripartizmit, por edhe si një nga nëpunësit e lartë të shtetit, që punoi me përkushtim dhe devocion në hartimin e politikave të mirëfunksionimit të pushtetit lokal dhe më gjerë, duke dhënë ndihmesën e tij të pakursyer në të gjitha proceset e ndryshimit dhe të zhvillimit të shoqërisë sonë.

Bashkëshortja e tij, znj. Merita Poni, pasi shprehu mirënjohjen e saj për vlerësimin e bërë nga ana e Bashkisë së Beratit, tha se do të donte që këto dekorata Ferdi t’i merrte vetë dhe të shihte se sa shumë ju e deshët atë dhe sa shumë e vlerësuat. “Jam shumë e prekur nga ky gjest tejet human, ku ju e shpërbleni për punën, mundin dhe sakrificat që ai bëri për qytetin e tij, duke më lumturuar mua dhe dy djemtë tanë, të cilët duhet të ndihen krenarë për veprën e babait të tyre”.

Në fjalën e tyre përshëndetëse, Eno Bozdo, Agron Musaraj, Roland Bejko dhe Tahir Muhedini, si kolegë dhe bashkëpunëtorë të F. Ponit, pasi vlerësuan çmimin që qyteti i tij i jepte, sollën mbresa, kujtime dhe emocione, duke theksuar disa nga cilësitë më të mira të tij, si intelektual i klasit të parë, si një njeri i përkushtuar, këmbëngulës dhe i vendosur për ta çuar deri në fund një detyrë që i ngarkohej. Ata u shprehën se me dhënien e këtij titulli sot Ferdinand Ponit i rikthehet gjithë ajo dashuri që ai ushqeu për qytetin e tij, për vendin dhe për të gjithë njerëzit.