Duka: Gjyq publik për të spostuar vëmendjen, vendi nën sundimin e një pakice

Kreu i PAA-së, Agron Duka, përmes një postimi në facebook, thotë se kryeministri Edi Rama ka ngritur Komisionin Hetimor për të hetuar Presidentin Ilir Meta, pasi kështu vëmendja ikën nga situata që vendi sundohet nga një pakicë e vetme.

Postimi i plotë

Shyqyr që doli ky Komisioni Hetimor për Presidentin e Republikës, sepse përndryshe opinioni publik do të duhej të merrej me ngritjen e çmimit të naftës, me ngadalësimin e rritjes ekonomike, me mungesën e investimeve të huaja, me projektligjin që kërcënon median online, me përgjimet e Bild, me rënien e rendit kushtetues dhe me dhjetra probleme të shtyra në kalendat greke. Ku ka më mirë se një gjyq publik për të spostuar vëmendjen gjetkë, ndërsa vendi nuk qeveriset, por sundohet nga një pakicë që të vetmin plan, ka mbajtjen e pushtetit me çdo kusht dhe me çdo kosto.