Kristaq Kume: KQZ, totalisht në kundërshtim me dekretin e Presidentit

Ish-kreu i Komisionit Qendror të Zgjedhjeve, Kristaq Kume ka komentuar qëndrimin e KQZ, në lidhje me moszbatimin e dekretit të Presidentit Meta, për shfuqëzimin e 30 qershorit, si data e mbajtjes së zgjedhjeve lokale dhe u shpreh se qëndrimi i KQZ-së është një qëndrim deklarativ.

I ftuar në emisionin “Arena” në RTV Ora, Kume u shpreh se shpreson që ky proces të mos shkojë deri në fund për të shmangur përplasjet.

“Qëndrimi i KQZ-së është një qëndrim deklarativ. Dhe nuk ka asnjë vendimmarrje. Nuk ka vendimarrje të KQZ-së që dekreti i presidentit është i pavlefshëm. Por veprimi i këtij institucioni është totalisht në kundërshtim me atë çka kërkon dekreti.

Në vlerësimin tim është një qëndrim që e ka rritur në menyrë të skajshme valencën politike të këtij institucioni. Nuk besoj të shkojë deri në fund ky proces. Si proces zgjedhor jo se jo, por as si votim. Ose do doja që të mos shkonte. Sepse me këtë që shohim sot pres që situata të dalë jashtë kontrollit”, tha Kume.