Gjonaj përshëndet arrestimin e drejtorit të Hipotekës dhe inspektorëve të AKU

Ministrja e Drejtësisë, Etilda Gjonaj, përshëndeti arrestimin e kreut të Hipotekës Shkodër dhe inspektorëve të AKU-së në Durrës.

Gjonaj: Jam këtu për të përgëzuar bashkëveprimin mes Prokurorisë, Policisë së Shtetit dhe organeve të tjera ligjzbatuese, të cilat janë konkretizuar sot me ndalimin e Regjistruesit të ZVRPP Shkodër dhe një specialisteje të këtij institucioni.Por jo vetëm ky rast. Një sërë operacionesh të finalizuara me sukses ditët e fundit janë frut i bashkëpunimit midis strukturave antikorrupsion, Policisë së Shtetit dhe Prokurorisë.Mjafton të përmendim ndalimin nga Policia e Shtetit të dy punonjësve të AKU-së në Durrës,

të cilët dyshohet se kanë kryer veprën penale të korrupsionit, të një tjetër punonjësi të ZVRPP Shkodër dhe dy shtetasve për ushtrim ndikimi të paligjshëm, për të vërtetuar efektshmërinë në rritje të forcës goditëse të shtetit kundër korrupsionit.

Në një dalje për mediat, Gjonaj tha se platforma e bashkëqeverisjes shqiperiaqeduam.al dhe Task Forca Antikorrupsion e Qeverisë nga njëra anë, si edhe bashkëpunimi në rritje Prokurori – Polici e Shtetit nga ana tjetër, po e fuqizojnë dita-ditës kapacitetin goditës të shtetit.

Gjonaj tha se të njëjtën vendosmëri dhe bashkëpunim do të duhet të demonstrojnë edhe në një sërë veprimesh të tjera të nisura tashmë.

Gjonaj: Dua të siguroj gjithë qytetarët se ky angazhim i përbashkët institucional do të vijojë me reagime konkrete, si një tregues i vendosmërisë së shtetit për të goditur pas asnjë tolerim,këdo që do të kryejë akte korruptive apo do të abuzojë me detyrën.

Ministrja tha se nesër do të komunikojë përsëri për një përmbledhje javore të rezultateve të veprimtarisë antikorrupsion.