PD: Durrësi, një bombë ekologjike

Kryetari i PD së Durrësit, Ferdinand Xhaferraj denoncoi sot infrastrukturën e rënduar në qytetin e Durrësit. Ai tha se nnë kulmin e sezonit turistik, Bashkia e qytetit nuk ka një plan për rrugët duke shkaktuar një rëndim trafiku me anë të punimeve që bëhen vetëm për fasadë.
“Ndërhyrjet në rrugë bëhen pa transparencë apo zhvillim të qytetit me planifikim. Nuk ka asnjë tabelë se kur fillin dhe mbaron puna, se kush e ka fituar tenderin, sepse nuk ka dhe bashkia vetëm ka bërë biznesin e radhës. Qytetarët e dinë që ky qytet ka problem kanalizimet sepse përmbytet disa herë në vit. Ky qytet ka problem mbledhjen dhe përpunimin e mbeturinave dhe Porto Romano është bombë ekologjike”,- tha Xhafarraj.
Ai u shpreh se ndërhyrjet që po kryhen në Durrës janë vetëm për reklamë dhe nuk sjellin asnjë përmirësim të jetës së banorëve.
“Por këtu bëhen ndërhyrje vetëm për makiazh dhe fasadë. Rrugët po zvogëlohen dhe trafiku po rëndohet. Zgjerimi i trotuareve nuk është gjë tjetër vetëm afera e radhës për parkingjet me pagesë që planifikon që të bëjë Bashkia. E gjithë kjo arrogancë buron se nuk janë në ato zyra si rezultat i votës por si rezultat i parasë së drogës, dhe kjo është një arsye më shumë që ky sezon turistik është kthyer në një stres për të gjithë “, tha Xhaferraj.