Kosova: GJND ne favorin tone
E Merkure, 02 Dhjetor 2009
Autoritetet ne Prishtine vleresojne se shpallja e pavaresise se Kosoves ishte ne harmoni te plote me te drejten nderkombetare. Ata shprehen optimiste se GJND-ja do te jape mendim pozitiv per Kosoven. Institucionet dhe subjektet politike ne Kosove presin nga Gjykata Nderkombetare e Drejtesise nje proces te drejte, te paanshem dhe ne favor te Kosoves dhe te se drejtes se popullit te saj per liri e pavaresi. Kryeministri i Kosoves, Hashim Thaci, deklaroi dje se Kosova i ka bere te gjitha pergatitjet e nevojshme qe te prezantohet sa me denjesisht para GJND-se ne Hage, per te argumentuar se shpallja e pavaresise ishte ne harmoni te plote me te drejten nderkombetare. Sipas tij, historia e tyre politike e juridike tregon se te tjeret kane bere shkelje te normave nderkombetare ne Kosove, duke ardhur me dhune dhe duke u larguar me dhune e gjenocid. "Ne jemi pavaresuar si Kosove pas shume viteve te vuajtjeve e perpjekjeve, luftes, por edhe ndihmes nga bota demokratike, qe ka ndalur gjenocidin e Serbise ne Kosove", tha Thaci. Kryeministri kosovar u shpreh i bindur se Serbia nuk do te kete sukses ne qellimet e saj per te frenuar zhvillimin e Kosoves dhe procesin e njohjes nderkombetare. Nderkaq, kryetari i Kuvendit, Jakup Krasniqi, tha se ceshtja e Kosoves edhe nje here po trajtohet si rast i vecante, pasi qe, sipas tij, nuk eshte praktike qe gjykatat te merren me probleme politike. "Edhe pse problemi i Kosoves ka qene problem politik dhe nuk eshte ne traditen e asnje gjykate te vendeve demokratike, por as te GJND-se, qe te merret me probleme politike, ju e dini se Kosova eshte 'sui generis' dhe ne kete rrafsh mendoj se, edhe kesaj radhe, ceshtja e Kosoves po trajtohet si nje problem 'sui generis'", theksoi Krasniqi.
Nderkohe, deputeti i Aleances per Ardhmerine e Kosoves, Ardian Gjini, tha se beson ne epilog pozitiv per Kosoven, ne menyre qe te mos krijohen pengesa ne procesin e integrimeve dhe njohjeve te reja. Kurse, paralajmerimet se GJND-ja mund te dale me nje mendim qe le hapesira interpretimi pozitiv per te dyja palet ne proces, sipas Gjinit, kjo nuk nenkupton se ai eshte negativ per Kosoven. "Sipas te gjitha gjasave, vendimi nuk do te jete ne disfavor te Kosoves. Nuk besojme se mund te kete vendim ne disfavor te Kosoves", tha ai. Sipas tij, dykuptimesia do te thote se vendet, popujt kane te drejte qe ta shpallin pavaresine kur ballafaqohen me regjime, te cilat jane te egra dhe brutale ndaj popujve.
