Bashkia u shemb shtepite, dru banoreve

Luljeta Ndoka

Reprezalja ka shoqeruar dje banoret prane Maternitetit te Ri, gjate aksionit te Inspektoratit te Ndertimit per prishjen e 71 banesave. Aty ku deri mengjesin e djeshem gjendeshin shtepite e tyre, pas prishjes nga Inspektorati i Ndertimit kishte vetem germadha. Te sakatuar nga policet ndertimore, zvarre-zvarre, banoret kane nxituar te shpetojne ato pak pajisje qe kane mbetur pa u prishur. Lotet nuk arrijne t'u thahen syve, e, te derrmuar ne shpirt e ne trup, ata kane filluar te pergatisin shtrojen e pluhurosur te "krevateve" te tyre. Germadhat e shtepive tashme te prishura do te jene per ta edhe krevat, edhe kuzhine, edhe banje dhe gjithcka tjeter.

Dhuna

Nje vajze, rreth te dymbedhjetave, e kuptoi vetem dje se jeta nuk eshte fushe me lule. "Fale" dhunes qe policet ushtruan mbi familjen e saj, ajo u kthye ne nje vajze te pjekur, e per me teper, te pastrehe. Duket shume e brishte teksa e sheh, por te trishton kur e degjon te flase. Lotet, urrejtja dhe dhimbja jane te teperta per moshen e saj. "As serbet nuk i trajtojne keshtu kosovaret. Ketu eshte kthyer ne Kabul. Na kane tmerruar", tregon per "KJ" vogelushja, syte blu te se ciles nuk thahen nga lotet. Dhunen e ushtruar ndaj banoreve e konfirmojne edhe qytetare te tjere. Sanie Dida tregon se dhendrin ia kane terhequr zvarre, teksa ai perpiqej t'u mbushte mendjen mos t'ua prishnin shtepine. "U mbyllem ne shtepi, qe te digjeshim qe te gjitha brenda, se s'kishim cfare te benim. Na nxoren me force dhe trajtuan si kriminele", tregon ajo. Edhe banoret e tjere flasin per zvarritje, shkopinj gome dhe rrahje nga ana e inspektoreve te ndertimores. Ata madje pohojne se kreu i Inspektoratit te Ndertimit, Afrim Qendro, i kishte trajtuar mjaft keq dhe kishte pohuar: "Une jam edhe Ali edhe Kadi".

Greva

Duket se per keta banore e vetmja zgjidhje e mbetur eshte greva e urise. Pikerisht per kete arsye, plot 11gra jane ngujuar dje ne nje godine te vjeter, qe ka shpetuar pa u prishur nga ana e ndertimoreve. Jane qe te gjitha hallexhije dhe pa asnje shprese per te gjetur nje strehe ku te fusin koken. Merita Nako, e cila e ka vajzen maturante, thote se e bija eshte traumatizuar dhe nuk e ka mendjen qe te mesoje. E, per me teper nuk ka se ku ta beje nje gje te tille. Ndersa Myzejen Meta rrefen se bashkeshorti i saj eshte mbuluar nga plaget, per shkak te dhunes qe eshte ushtruar ndaj tij. Nje tjeter greviste pohon se ka 9 femije, por per asnjerin nuk e di se ku ndodhej per momentin. "Nuk e di se nga kane ikur. Jane tmerruar dhe si duket ende nuk e kane marre veten nga ajo c'kane pare. Te rrahin baballaret ne sy te femijeve, me duket e tmerrshme, sepse i trajtuan si te ishin kriminele", pohojne grate greviste.

Kryefamiljaret, "sqarime" ne rajon

Ndersa grate dergjeshin pa buke ne nje ndertese mizerabel, bashkeshortet e tyre ndodheshin ne polici per te dhene shpjegime mbi vetembrojtjen e tyre. Me sa duket, punonjesit e policise kane ngaterruar motivacionin e dergimit te banoreve ne rajon, sepse ne fakt duhej te ishin pikerisht keta te fundit ata qe duhej te denonconin dhunen e pameshirshme qe kane perjetuar ne kurriz te tyre. Por, per sa kohe qe strukturat e pushtetit vendor te funksionojne, ashtu sic deklaruan drejtues te Inspektoratit te Ndertimit, "vete Ali e vete Kadi", do te ishte e cuditshme qe banoret e pastrehe te merrnin te drejten qe u takonte. Ne fund te fundit, duke lene menjane prishjen e banesave te tyre, me e pakta qe duhej te benin policet e Inspektoratit te Ndertimit, do te ishte mos ushtrimi i dhunes. Nje gje e tille jo vetem qe nuk ndodhi, por kaloi cdo parashikim.

Sejdin Biba, deshmitari qe pa tmerrin me sy

Sejdin Biba eshte nje prej banoreve qe ka mbetur i pastrehe. Qetesia i ka humbur tashme bashke me traumen qe perjetoi dje. Ai shprehet se bashkia i ka demtuar disa fish. "E para, na demtuan me faktin qe na lane pa nje strehe ku te fusim koken. E dyta, ata na demtuan te gjitha pajiset qe kishim brenda, te cilat po mundohemi qe t'i gjejme e t'i bejme te perdorueshme. E treta, ata na rrahen, na terhoqen zvarre, na tmerruan femijet", tregon Sejdini. Nuk ka fjale qe do ta pershkruante sic duhet tmerrin qe ai po kalon. Dhuna ka kaluar cdo kufi dhe me e keqja eshte se ata mbeten rrugeve. "Do te fleme ketu buze Lanes. Do te shtrojme disa mushamaje do te hedhim ndonje batanije persiper dhe do te perpiqemi qe te fleme. Megjithate do te jete shume e veshtire, me kete qe na beri bashkia", thote i perlotur, duke lene menjane krenarine prej burri.

U premtua nje muaj kohe, por u shkel

Banoret qe jane prekur drejtperdrejt nga prishja e 71 banesave shprehen se fillimisht kryetari i Bashkise, Edi Rama, u pati premtuar se do te kishin 1 muaj kohe per te mbledhur plackat dhe per te gjetur ndonje shtepi me qira, a cfare do qofte. Megjithate, nje premtim i tille, sipas banoreve, nuk u mbajt. Na erdhen para dy ditesh punonjes te Inspektoratit te Ndertimit dhe na thane qe te marten do te na prishnin shtepite. Menduam se po talleshin, ndersa sot pame qe fatkeqesisht ishte e vertete", thote te traumatizuar qytetaret, tashme te pastrehe. Ata shprehen se shumica i kishin shtepite ne proces legalizimi, e megjithate nje gje e tille nuk u mor parasysh. "Nuk kishte pamje me te tmerrshme sesa te shihje teksa shkaterrohej mundi dhe djersa e nje jete te tere", shprehen banoret. Ata nuk kane c'te bejne me, pervecse t'i nenshtrohen fatit te keq dhe te bejne greve.