Vajza me talasemi, 3 muaj pa analiza

I ulur ne cep te salles degjon me vemendje te gjitha fjalimet, te dhenat dhe premtimet per talasemiket, nderkohe qe vazhdon te mendoje per vajzen e tij, qe eshte e prekur nga kjo semundje. Vitet e jetes se Bashkimit nuk i kalojne as 35, por duket se hallet qe ka e kane plakur ate para kohe. "Vajza ime, e cila eshte vetem 11 vjece, eshte e semure nga talasemia. Pervecse problemit te semundjes, duhet te perballemi edhe me probleme te tjera. Prej tre muajsh, asaj nuk i eshte bere asnje analize per shkak se spitali shteteror nuk i kryen keto lloj analizash, kurse une nuk jam ne gjendje te perballoj pagesat", pohon Bashkimi. Sipas tij, te ardhurat e familjes jane vetem 20 mije leke ne muaj, nderkohe qe ka edhe dy femije te tjere per te mbajtur. "Analizat ne privat kushtojne shume, te pakten 30 mije leke te vjetra. Por keto analiza duhet te behen cdo 21 apo 28 dite, kur vajza ben transfuzionin e gjakut, per mua kjo eshte e paperballueshme", pohon 35-vjecari. Por, per te nuk eshte problem vetem kryerja e analizave ne kohen e duhur, por edhe sigurimi i gjakut. Te vetmet menyra per ta siguruar ate, sipas Bashkimit, jane miqesite dhe pagesat nen dore. "Sigurimi i gjakut behet gjithmone edhe me i veshtire per ne. Ate arrijme ta sigurojme vetem nepermjet miqesive apo edhe pagesave, ne te kundert, vajza do te mbetej sa e sa here pa gjak" pohon 35-vjecari. Sipas tij, iniciativat qe duhet te marre shteti duhet te jene shume te medha, pasi nje pjese e mire e familjeve qe kane femije te semure me talasemi jane te varfer dhe nuk mund te perballojne edhe shpenzimet per kryerjen e analizave, gjetjen e gjakut apo edhe marrjen e disa medikamenteve. Nderkohe qe, sipas Bashkimit, frika me e madhe eshte marrja e infeksioneve gjate transfuzionit te gjakut. Sipas tij, te arrish te gjesh nje qese me gjak eshte shume e veshtire dhe duket si nje enderr, por aty mund te jete edhe virusi. "Ne momentin qe arrijme te sigurojme gjakun, nuk ka gezim me te madh per ne, por ky shuhet sepse nuk e dime sa i sigurt eshte. Aty brenda mund te jete nje virus vdekjeprures apo i pasherueshem", thote Bashkimi.

Lushnje, mbartes 10% e nxenesve

Depistimet e kryera me se fundi nga Drejtoria e Shendetit Publik ne Lushnje kane treguar se nje pjese e madhe e femijeve te kesaj zone jane mbartes te semundjes se talasemise. Sipas te dhenave, rezulton se 10 per qind e te rinjve ne kete qytet jane mbartes se semundjes se talasemise. Ata kane lindur nga prinder, ku njeri prej tyre ka qene bartes. Nderkohe qe Drejtoria e Shendetit Publik nuk ka te dhena per rrethet Fier dhe Vlore, te cilet vazhdojne te renditen nder te paret per numrin e madh te personave te prekur nga kjo semundje. Keshtu, ne Fier 22 per qind e popullsise rezulton te jete e prekur apo mbartese e talasemise, ne Lushnje 17 per qind, Vlore 16 per qind, kurse ne Sarande 12 per qind. Fondacioni i Femijeve Shqiptare "Domenick Scaglione", nje vit me pare mbeshteti me nje fond prej 100 mije USD ngritjen e qendres rajonale ne Lushnje, qe asiston te gjithe femijet e semure me talasemi nga zona e Lushnjes, Fier, Berat, Vlore qe perbejne dhe zonen kryesore te bartesve dhe shfaqjes se patologjise se talasemise.

Zhduket marreveshja

Nje marreveshje e firmosur 3 vjet me pare ne Ministrine e Shendetesise se bashku me rajonin e Peskares ne Itali eshte zhdukur. Sipas saj, parashikohej qe per nje periudhe 3-vjecare te kryhej transplantimi te 50 femije. Por pervecse nuk eshte bere asnje transplantim nga kjo marreveshje, ajo rezulton e zhdukur nga institucionet shendetesore. Me nderrimin e ministrave dhe kabineteve, ashtu si edhe te drejtuesve te spitaleve ka ndodhur edhe zhdukja e kesaj marreveshje.