Kur kanë kaluar 24 orë nga njoftimi i vetëm i Policisë së Shtetit lidhur me ngjarjen e djeshme në aeroportin e Rinasit, ku u shënua grabitja më e madhe e parave e shënuar ndonjëherë në Shqipëri, ministri i Brendshëm Sandër Lleshaj shfajëson policinë, duke ia ngarkuar përgjegjësinë e ngjarjes kompanisë koncensionare për administrimin e aeroportit
Në një deklaratë për mediat, Lleshaj tha se koncensionari nuk lajmëroi në kohë policinë.
“Nga analiza rezulton se nuk kanë funksionuar aspak mekanizmat e sigurisë në përgjegjësi të kompanisë koncesionare të aeroportit. Koncesionari dhe kontraktori i zgjedhur që përgjigjet për sigurinë fizike nuk kanë arritur të zbatojnë standardet.
Autorët e sulmit kanë lënë në dorë të policisë prova të shumta materiale. Pas humbjes së djeshme të një anëtari të saj banda ka marrë një goditje shkatërruese”, tha Lleshaj.
Udhëtarët paguajnë nga 3 euro për sigurinë, dhe vetëm kjo do të kishte mjaftuar që situata të ishte ndryshe tha Lleshaj. Koncensionari i ka refuzuar kërkesat e Policisë së Shtetit për rritjen e sigurisë, por as nuk ka denjuar – tha ministri – që të kthejë përgjigje.
Ministri foli për një marrëdhënie të vështirë me kompaninë koncensionare në aeroportin e Rinasit, duke thënë se autoritetet ligjore do të marrin masa.
Lleshaj tha se ishte reagimi i shpejtë i Policisë së Shtetit që tashmë në duar të autoriteteve janë një sërë provash që mund të cojnë drejt zbardhjes së grupit të grabitësve.
Falenderimet Lleshaj i kishte për qytetarët, bashkëpunimin dhe besimin tek Policia e Shtetit, ndërsa nuk la pa shprehur mllef ndaj politikës që lëshon akuza. Në përfundim të deklaratës, ministri Sandër Lleshaj garantoi udhëtarët se siguria e tyre në aeroport nuk do të cënohet.
“Nuk janë përmbushur përgjegjësitë e kompanisë kineze të aeroportit. Kompania kineze dështoi. Koncesionari dhe kontraktori i zgjedhur prej tij nuk zbatuan standardet e detyrueshme që përcaktohen nga legjislacioni me gjithë se kanë arkëtuar 3 euro për cdo pasagjer që ka dalë nga ky aeroport.
Do të kishte mjaftuar kjo sasi për të garantuar perimetrin e jashtëm, që është hapur dhe për më keq, koncesionari nuk ka arritur që të sinjalizojë policinë. Koncesionari jo vetëm që ka refuzuar kërkesat e policisë për marrjen e masave, por në shumë raste nuk ka kthyer edhe përgjigje për korrespodencën zyrtare. Nisur nga incidenti dhe marrëdhëniet e vështira me koncesionarin, Shqipëria do të marrë masa ligjore të forta për të garantuar të gjitha standardet në Rinas. Siguria e jetës dhe pronës prevalojnë.
Me masat e reja garantohet një nivel i ri sigurie dhe në përputhje me standardet ndërkombëtare. Sa i përket dinamikës, dua të them se autorët kanë lënë në dorë të hetimit prova të shumta. Falë reagimit të shpejtë, banda që besohet se edhe më parë ka goditur vlerat monetare në Rinas, pas humbjes së djeshme të një anëtari të saj ka marrë një goditje shkatërruese. Shkatërrimi i këtij grupi është një tjetër sinjal ndaj botës së krimit. Jemi të angazhuar për të neutralizuar cdo tentativë që cënon sigurinë. Shpreh keqardhje që segmente të politikës u rreshtuan kundër policisë dhe akuzuan, kur pritej përkrahja e cdo grupi politik. Siguroj qytetarët që përdorin aeroportin, se siguria është plotësisht e garantuar”, ministri Lleshaj.
Lajmi në përditësim…