Debati për kufijtë Kosovë-Serbi, Ruçi për ”KJ”: Kemi 4 rekomandime

Në fillim të sesionit parlamentar për 2019, kreu i Kuvendit, Gramoz Ruçi në një komunikim me gazetarët, prezantoi punimet e Kuvendit për 2018. Pyetjes së gazetarit të ”Koha Jonë”, Redjon Shtylla, për debatin e ndryshimit të kufijve Kosovë-Serbi dhe qëndrimin e Shqipërisë, Ruçi për herë të parë theksoi se janë katër elementë që mbyllin këtë marrëveshje. Edhe pse në fillim është shprehur se nuk do ta komentojë një çështje të tillë, ai tha se vendi ynë do respektojë çdo vendim që do marrë shteti i Kosovës, mjafton që ai të jetë i konsultuar me BE-në dhe me SHBA-të.

Pyetja: Në hapësirën shqiptare ka një debat për korrigjimin e kufijve në Kosovë që cilësohet dhe si copëtim i Kosovës. Nga qeveria shqiptare ka një paqartësi lidhur me marrëveshjen Serbi-Kosovë. Cila duhet të jetë sipas jush qëndrimi i i shtetit shqiptar në këtë marrëveshje?

”Është një shqetësim real. Nuk dua të bëhem pjesë e këtij debati dhe shpesh pozojmë duke thënë kush është pro dhe kush është kundër. Kosova është shtet sovran dhe ka institucionet e veta. Ne si Shqipëri duhet ta respektojmë dhe duhet të mirëkuptojmë zgjidhjet që do të japin institucionet e Kosovës. Ajo që ne rekomandojmë apo kemi si qëndrim është ky; institucionet e Kosovës të kenë një vendim unik, së dyti partitë në Kosovë të ketë një mendim unik, së treti institucionet e Kosovës ti zgjidhin problemet me dialog dhe së katërti duhet të jetë e dakordësuar me SHBA dhe BE”,-përfundoi ai.

Nga ana tjetër, Ruçi komentoi edhe protestën e paralajmëruar nga opozita. Pyetjes se: ”Opozita ka paralajmëruar protesta masive në gjithë vendin duke kërkuar largimin e qeverisë. A ka përgjegjësi Parlamenti dhe mazhoranca për krizën politike ku po hyn vend?”, Ruçi ju përgjigj duke thënë se ai do të ndikojë që të garantohet hapësira, integriteti dhe normaliteti.

“Opozita nuk merr leje nga ju apo unë për protestat. Unë do të ndikoj në të gjitha hapësirat e mia, që të garantohet hapësira, integriteti dhe normaliteti. Nuk mendoj se vendi jonë është në krizë, ka probleme si cdo vend por nuk mendoj se është në krizë. Duhet të jemi më realistë për ta vlerësuar më shumë me sy dashamirës realist arritjet dhe zhvillimet në vend”.

Pyetjet e plota të gazetarëve dhe përgjigjet e z.Ruçi!

Zoti Ruçi, pak ditë më parë Presidenti i Republikës refuzoi që Genti Cakajn ta dekretojë si ministër të Jashtëm, akt i cili u konsiderua nga Kryeministri si antikushtetues. Ju e ndani këtë mendim të Kryeministrit? Pra, sipas jush ishte shkelje e Kushtetutës nga Presidenti Meta?

Faleminderit për pyetjen! Sigurisht, ka qenë një problem që ju e keni diskutuar gjatë e gjerë në të gjitha ekranet dhe gazetat tuaja, në rrjetet sociale e të tjera. Unë nuk jam këtu për të bërë komentet për komentet që janë bërë për këtë çështje, qoftë nga gazetarët, analistët, qoftë nga juristët konstitucionalistë ose përfaqësues të institucioneve të tjera. Unë jam këtu me atributet e Kryetarit të Kuvendit dhe kam një koment lidhur me këtë.
Në nenin 76 të Kushtetutës, kur flitet për Kryetarin e Kuvendit, midis të tjerave thuhet: “Kryetari siguron respektimin e të drejtave të Kuvendit dhe të anëtarëve të tij”. Çfarë dua të them me këtë? Neni 1 i Kushtetutës së Shqipërisë në paragrafin e tij hapet me fjalinë: “Shqipëria është republikë parlamentare”. Presidenti i Republikës emërohet dhe shkarkohet nga parlamenti, Kryeministri i vendit emërohet dhe shkarkohet nga parlamenti, pra institucionet kushtetuese emërohen dhe shkarkohen nga parlamenti. Shumëkush e ka trajtuar këtë problem nëse ka të drejtë presidenti apo nuk ka të drejtë presidenti. Unë nuk merrem me këto komente, por merrem me nenin 93 të Kushtetutës, të cilin, më vjen keq, por të gjithë ata që flasin në emër të Kushtetutës, siç edhe jua thashë, nuk e kanë lexuar nenin e parë ende, ashtu sikurse nuk kanë lexuar edhe nenin 93 të Kushtetutës. Neni 93 i Kushtetutës thotë: “Presidenti i Republikës në zbatim të kompetencave të tij nxjerr dekrete ose shprehet me dekret”. Pra, unë nuk e vë fare në diskutim a ka të drejtë Presidenti të thotë po ose jo, por ajo që thotë Kushtetuta është që Presidenti për të gjithë kompetencat që ka duhet të shprehet me dekret. Çfarë do të thotë kjo? Kjo do të thotë që, siç e lexoj unë Kushtetutën, edhe kur jep pëlqimin, edhe kur nuk e jep pëlqimin, pra ka kundërshtim, duhet të nxjerrë dekret. Pse duhet nxjerrë dekret? Duhet nxjerrë dekret se është kompetencë e Kuvendit të shprehet si për pëlqimin, edhe për mospëlqimin e dekretit. Ky është komenti që kam unë, nuk ka dy emërime. Kryeministri, sipas Kushtetutës, bën propozimin, Presidenti, sipas leximit që i bëj unë, jep pëlqimin, parlamenti nxjerr vendimin, qoftë për shkarkimin, qoftë për emërimin, qoftë për pëlqimin, qoftë për mospëlqimin.
Megjithatë, le t’i lemë këto dhe të presim ditën dhe orën që Gjykata Kushtetuese të ngrihet dhe lidhur me këtë interpretim, qoftë edhe timin, le të shprehet ajo dhe atëherë të heshtim të gjithë. Faleminderit!

Zoti Ruçi, duke mirëkuptuar përpjekjen tuaj për të pasur vetëm komunikim institucional, ju lutem, mirëkuptoni një pyetje timen sërish politike, si kolegu im. Tashmë që Partia Socialiste ka maxhorancën e vetme, pse në qeveri kjo parti është gjithmonë e më pak e përfaqësuar, referuar ndryshimeve të reja qeverisëse që miratoi Kuvendi, ku njerëzit janë kryesisht teknikë dhe jo ekipi elektoral i Partisë Socialiste? 

Do të më kurseni, siç jua kam thënë edhe herë tjetër, për të interpretuar ose për të dhënë përgjigje politike, por përsëri dua të bëj një koment të shkurtër për këtë çështje. Do të kërkoja mirëkuptimin tuaj, pasi sistemi që lamë pas ishte sistemi i partisë-shtet. Sistemi që jemi, është sistemi i partisë në pushtet, po kjo nuk do të thotë se kur je në pushtet, duhet të jenë anëtarët e forumeve dhe anëtarët e partisë në pushtet, madje është e gabuar. Çdo parti që vjen në pushtet nuk vjen me votat e anëtarësisë së vet, se maksimumi, çdo parti në Shqipëri ka 100 mijë anëtarë, ndërkohë duhen mbi 700 mijë vota për të qenë në pushtet. Në dijeninë time, nuk ka asnjë cedim, pasi, meqë kanë zhvilluar fushatë elektorale, logoja e kësaj partie ka qenë “Bashkëqeverisje me qytetarët”, kështu që është brenda filozofisë së alternativës, së fushatës dhe votave që ka marrë në atë fushatë elektorale.

Zoti Ruçi, opozita ju ka akuzuar në seancën e kaluar parlamentare se po silleni si partiakë dhe jo si Kryetar i Kuvendit. A ndiheni përgjegjës për largimin e opozitës në seancën e kaluar nga parlamenti?

Asnjëherë nuk duhet thënë që drejtimi i Kuvendit është perfeksion, megjithatë, unë jam munduar që prej ditës së parë si Kryetar Kuvendi, ta bëj detyrën pa marrë parasysh se nga ç’forcë politike vij. Me këtë nuk dua të them që jam departizuar, as që jam depolitizuar, por unë kështu e interpretoj detyrën që më ka besuar ai subjekt politik që më propozoi dhe që Kuvendi e votoi më pas. Sa më mirë ta bëjë këtë detyrë, aq më mirë do t’i shërbej edhe atij subjekti politik që më zgjodhi. Sa më keq ta kryej detyrën, aq më keq do të jetë për atë subjekt politik që më ka zgjedhur. Do të doja të sillja në vëmendjen tuaj që asnjë ditë, asnjë orë, asnjë moment dhe në asnjë fjali nuk e kam përdorur pushtetin si mikrofon të Kryetarit të Kuvendit, për të denigruar asnjë deputet, e aq më pak një grup parlamentar, por rigorozisht Kryetari i Kuvendit ka vetëm një detyrë funksionale, të zbatojë me korrektësinë më të madhe Rregulloren e Kuvendit. Kështu që kërkesa e opozitës në seancën e kaluar të jashtëzakonshme ishte në kundërshtim me Rregulloren dhe me të gjithë precedentët parlamentarë të përdorur në 28 vjet. Siç e thashë edhe në seancë, vetëm 10 vjetët e fundit janë zhvilluar 37 seanca emërimesh dhe shkarkimesh ministrash, janë shqyrtuar 167 dekrete presidentësh në vite për emërime dhe shkarkime ministrash dhe nuk ka pasur asnjë debat. Cila është zgjedhja që bën opozita, qëndron apo jo në sallë, ajo është sovrane në vendimet e saj, unë nuk e paragjykoj, sepse është në të drejtën e saj.

Zoti Ruçi, kam edhe një pyetje tjetër!  Ju thatë se ky sesion do të jetë sesioni i përmbushjes së reformës zgjedhore. Në fakt, dje ka pasur edhe një mesazh nga komisoneri Hahn, i cili ka kërkuar dialog politik dhe maxhoranca tregoi bashkëpunim për përmbylljen e reformës. Nga ana tjetër, në parlament është depozituar një draft i njëanshëm nga ana e shumicës parlamentare. Opozita ka kërkuar që reforma zgjedhore të kalojë në komision. Në këto kushte, zoti Ruçi, ju a do t’i kërkonit shumicës parlamentare që ta tërheqë këtë draft dhe e gjithë puna të finalizohet në Komisionin e Reformës Zgjedhore?

Unë nuk e kam përcjellë këtë draft as në programin e Kuvendit dhe as në kalendarin e Kuvendit. Kjo do të thotë se drafti është aty, në mënyrë që ta sjellë Komisioni ad hoc për Reformën Zgjedhore. Siç kam bërë apel gjatë sesionit të kaluar, përsëri, edhe në prag të fillimit të këtij sesioni, apeloj që maxhoranca dhe opozita në komisionin ad hoc të dialogojnë, të konkludojnë dhe ta depozitojnë në Kuvend dhe vetëm atëherë unë, si Kryetar Kuvendit, do ta përfshij në Kryesinë e Kuvendit, në programin dhe në kalendarin e punimeve të Kuvendit. Dua të them se vetëm mungesa e vullnetit politik ka bërë që ky objektiv shumë i rëndësishëm, që ka pasur Kuvendi, nuk është realizuar. Kështu që unë i bëj si opozitës, edhe maxhorancës që ditët që kanë mbetur të mos kthehen në muaj, pasi qershori është shumë afër. Komisioni Qendror i Zgjedhjeve ka nevojë për librin e rregullave dhe ndryshimet që Kuvendi do të bëjë, dhe Kuvendi duhet t’i përmbushë sa më shpejt të jetë e mundur, sepse është edhe një objektiv për objektivin madhor, që kemi të gjithë së bashku, siç është hapja e negociatave në qershor të 2019-ës.

Si përfaqësuese e një televizioni me natyrë ekonomike edhe pyetja ime do të fokusohet në këtë pjesë. Ju folët për hapjen e negociatave dhe keni ndërmarrë një tur lobimi. Në këndvështrimin tuaj, nga takimet që keni zhvilluar dhe nga të dhënat që keni, a ka ndonjë kriter ekonomik që mund ta penalizojë Shqipërinë në këtë drejtim e në veçanti i referohem çështjes së pronësisë?

Sigurisht që unë po ndjek me shumë vëmendje dhe po loboj në zbatim të funksioneve të mia si Kryetar i Kuvendit, jo vetëm unë, por të gjitha delegacionet e Kuvendit të Shqipërisë, të gjithë deputetët e Shqipërisë që këtë 6-mujor t’u përkushtohemi pikërisht lobingjeve në parlamentet respektive të BE-së në funksion të objektivit madhor që kemi për hapjen e negociatave. Sigurisht që në axhendën e punës së Kuvendit janë pikërisht ato probleme që ka përcaktuar në radhë të parë raporti që ka ardhur gjatë vitit të kaluar. Për ato ne kemi përcaktuar si objektivat, ashtu edhe masat, si dhe po i ndjekim për ditë ato për t’i përmbushur, për t’i realizuar siç thuhet ndryshe të gjitha “detyrat e shtëpisë” që ka Shqipëria në tërësi dhe çdo institucion i saj në veçanti. Ju pyesni lidhur me kriterin ekonomik ose me çështjen e pronave, dua të them se problemi është i drejtë, është një problem për vendin tonë. Kjo është arsyeja që kohët e fundit Kuvendi i Shqipërisë ka miratuar një nga ligjet që zgjidh çështjen e pronësisë, siç është ligji “Për kadastrën”. Pra, jemi duke e ndjekur këtë problem, por nuk ka ndonjë kusht të Bashkimit Europian për këtë çështje edhe pse ky i fundit e njeh dhe po ndjek hapat që hedh Shqipëria për zgjidhjen përfundimtare të këtij problemi.

Zoti Kryetar, përpara zgjedhjes së Presidentit, ju nga foltorja e parlamentit iu drejtuat zotit Meta, se nëse nuk zgjidhej emri i Presidentit, do të kërkonit zgjedhje të parakohshme për 45 ditë. A jeni penduar për zgjedhjen e Ilir Metës President pas gjithë këtyre zhvillimeve të fundit? Nëse më lejoni, kam edhe një pyetje tjetër, Presidenti ditët e fundit ka kthyer disa ligje. A kanë probleme ligjet që ju keni bërë, apo ka probleme Presidenti me ju?

Lidhur me deklaratën time para raundit IV, absolutisht nuk jam bërë pishman. Ka qenë një deklaratë, e cila përfaqësonte jo vetëm mendimin tim, por edhe sikur të përfaqësonte mendimin tim si kryetar i grupit, përsëri theksoj edhe sot e kësaj dite, që nuk kishte luksin Shqipëria të kalonte nga zgjedhjet në zgjedhje, në atë kohë kur unë e bëra. Kështu që ka qenë deklaratë, që Kuvendi e mbështeti dhe e kurorëzoi me zgjedhjen e Presidentit. Sigurisht, unë nuk jam pishman për votën që jap dhe për qëndrimet që mbaj në këtë çështje dhe, sigurisht, nuk kam pritur që Presidenti i Republikës, kushdo të ishte ai, edhe zoti Meta, të operojë gjatë përmbushjes së detyrës së tij sipas orekseve politike, elektorale apo partiake të asnjë pale. Kam pritur dhe pres që zoti Meta të zbatojë Kushtetutën si President i vendit dhe vetëm kaq. Për këtë nuk kam se pse të jem pishman, ashtu sikurse edhe përkthimi i ligjeve është në kompetencën e tij, që me dekret i është drejtuar. Ka kthyer dy projektligje, projektligjin “Për kadastrën” dhe projektligjin “Për noterinë” me vërejtjet përkatëse. Sapo kam vënë shënimin përkatës që ato të programohen dhe të shqyrtohen në seancat përkatëse. Komisionet nuk kanë dhënë mendimet e tyre, se ende nuk është hapur sesioni, kështu që edhe unë nuk kam përgjigje që të them se argumentet që ka sjellë Presidenti qëndrojnë apo nuk qëndrojnë, por edhe sikur të kisha një mendim, nuk më lejohet, pasi këtë vendim do ta japë vetëm Kuvendi i Shqipërisë nëpërmjet votave.
Për mua nuk ka ndonjë gjë të jashtëzakonshme si për kthimet apo arsyetimet që bën Presidenti ashtu dhe për vendimet që merr parlamenti. Kështu që sa më komplementar të jemi, në kuptimin e respektimit, e frymës dhe të germave, që ka Kushtetuta e Shqipërisë, aq më mirë do t’i bëhet vendit dhe të gjithë shqiptarëve. Kështu që sipas Kushtetutës sonë, që ju e quani ndryshe “check&balance”, është një gjë fare normale që Presidenti të shprehë pikëpamjet e tij për projektligjet që miraton parlamenti, ashtu sikurse edhe parlamenti është sovran në vendimin që do të marrë.

Zoti Ruçi, disa ditë më parë Zëri i Amerikës publikoi disa përgjime, ku deputetë të Partisë Socialiste, përfaqësues të saj dhe drejtoresha e kabinetit të Kryeministrit implikohen në një ndërhyrje për sa u përket punësimeve, gjë që vë, në fakt, në dyshim konkurset publike që po bën maxhoranca, a mendoni ju se këto përgjime janë përgojime dhe Zëri i Amerikës po flet nga kazani i Tiranës, siç tha Kryeministri Rama? A jeni i shqetësuar që ka influenca të paligjshme edhe nga ana e Partisë Socialiste për sa u përket punësimeve në administratë?
Faleminderit!

Çfarëdolloj konferencë shtypi që të bëhet, ju pushteti i katërt jeni të tmerrshëm që të gjeni ose të kundërviheni që të gjeni lajmin se çfarë tha Rama për Presidentin, Presidenti për Ramën, Kryetari i Parlamentit për këtë, për gazetarët apo për Zërin e Amerikës. Nuk futem në këto komente. Ju thashë që nuk bëj komente për komentet. Për mua është një gjë shumë e mirë që në Shqipëri çdo ditë e më shumë po forcohet dhe po konsolidohet statusi i administratës shtetërore. Kjo është një gjë shumë pozitive. Po ju sjell shembullin e Kuvendit, ku janë ndryshuar kryetarët çdo katër vjet, por besoj ju gazetarët më atë staf të Kuvendit që keni komunikuar po komunikoni. Pse? Sepse i mbron ligji. Sigurisht, mbron atë që bën detyrën dhe, kur nuk e bën detyrën, e heq përsëri ligji dhe jo titullari. Kështu që komenti është ky: është një arritje pozitive e Shqipërisë që së fundi edhe administrata shtetërore të mos lëvizë sipas partive, të cilat bëjnë rotacionin politik. A është e përkryer kjo?! Sigurisht që jo. Prandaj është Kuvendi që të kontrollojë se si zbatohen Kushtetuta e vendit, ligjet e tij dhe aktet ligjore dhe nënligjore të këtij vendi, prandaj jeni edhe ju që çdo ditë të pozoni fakte pa i përgjithësuar, sepse mund të ketë raste, siç ishte rasti që ju përmendët, por kjo nuk do të thotë se administrata e shtetit apo punësimet në shtet bëhen mbi baza partiake.

Zoti Ruçi, a do të miratojë parlamenti një ligj për Presidentin e Republikës? Sepse në kuadër të reformës në drejtësi është hartuar një draft dhe deri para pak muajsh ka qenë edhe në faqen zyrtare të parlamentit.

Nuk ka ardhur një projektligj i tillë. Ai draft ka qenë shumë kohë më parë aty. Për këtë çështje kam dëgjuar edhe ankesa të ish-presidentëve, të cilët e kanë kërkuar. Në momentin që do të vijë, sigurisht që nga Kuvendi nuk do të ketë asnjë zvarritje për ta futur në procedurat parlamentare, për ta gjykuar dhe për ta vlerësuar projektligjin, i cili ende nuk ka mbërritur në Kuvendin e Shqipërisë.

Sa efektiv ka qene debati parlamentar në mungesë të opozitës?Ndonjë përgjigje për vetingun politik, ne kushtet e marrëdhënies së kushtëzuar të opozitës?

Së pari, opozita është sovrane në qëndrimet që mban, në taktikat dhe strategjitë që ajo përdor në raport me luftën e saj politike. Sigurisht, edhe unë kam qenë dikur opozitar dhe kam përdorur këto taktika, si për raportin e kushtëzuar, si për bojkotin parlamentar e të tjerë. Në detyrën që kam në Kuvend, sigurisht, kur kam folur një sesion më parë, kam thënë të kundërtën e këtyre shifrave në debatet parlamentare që janë zhvilluar. Pra, orët e debateve parlamentare kanë qenë dy herë e gjysmë më shumë dhe raporti midis opozitës dhe pozitës ka qenë në favor të opozitës. Sigurisht që kjo opozitë i ka munguar Kuvendit dhe, nëse ajo do të ishte e pranishme, polarizimi i jetës parlamentare do të ishte më i madh, konflikti dhe debati do të ishin më të ndezur, vështirësia për Kryetarin e Kuvendit dhe drejtuesen e seancës do të ishte më i madh, por produkti i Kuvendit do të ishte më pozitiv. Kjo është një gjë e njohur. Apeli që kam unë: vendi ku zhvillohet opozitarizmi më produktiv, kjo edhe nga përvoja ime, është salla e Kuvendit. Ju thatë se e ka të kushtëzuar, unë di që deri tani opozita nuk është shprehur për këtë çështje, nuk do ta uroja. Shpresoj dhe besoj që lufta opozitare të jetë në sallën e Kuvendit, pastaj jashtë sallës së Kuvendit është e drejta e tyre. Unë jam aty jo për të garantuar, sepse nuk garantoj unë, por për të respektuar të gjitha hapësirat që parlamentarizmi shqiptar, sipas Rregullores së miratuar nga pozita dhe opozita e asaj kohe, të respektohet në frymë dhe në germë nga unë, si Kryetar i Kuvendit.

Opozita ka lajmëruar protesta masive në të gjithë vendin, a kanë përgjegjësi Kuvendi dhe qeveria për krizën në të cilën po hyn vendi? Faleminderit!

Ti e nxore konkluzionin vetë, pa pritur se çfarë do të them unë. Kështu që opozita nuk merr leje as nga unë, as nga ju që të zhvillojë protesta, është normë demokratike. Unë i përshëndes ato dhe do të ndikoj, në të gjithë hapësirat e mia institucionale, që të garantohet hapësira, legjitimiteti dhe normaliteti i këtyre aktiviteteve opozitare, por nuk mendoj se vendi ynë i përbashkët është në një krizë. Sigurisht, ka probleme, si në çdo vend në botë, si çdo vend demokratik, por e rëndësishme është që ato të njihen dhe hap pas hapi të zgjidhen. Ju lutem, unë e di që ju jeni përfaqësues të medies dhe niseni nga ajo që lajmi keq, është lajm, lajmi mirë, nuk është lajm, por duhet të jemi më realistë për t’i vlerësuar më shumë me sy dashamirës, objektiv dhe realist arritjet dhe zhvillimet në vend, sigurisht, duke pasqyruar edhe problematikat që ekzistojnë në institucionet e shtetit shqiptar, në ekonominë shqiptare, në jetën sociale shqiptare, në jetën kulturore, artistike e të tjera.

Zoti Ruçi, aktualisht cili është roli i parlamentit në ristrukturimin e institucioneve të drejtësisë? A do të krijonte mungesa e opozitës në parlament një pengesë që afati i ristrukturimit të këtyre institucioneve të shtyhet edhe më shumë? Kjo e fundit u përmend edhe nga eurokomisioneri, zoti Hahn.

Lidhur me rolin, unë e thashë se cilat ishin tre drejtimet e Kuvendit kur parashtrova për organet e drejtësisë. Sipas ligjit për sistemin e drejtësisë, Kuvendi ka edhe një institucion, që quhet institucioni që monitoron ecurinë e kësaj reforme, që tashmë është ngritur. Kuvendi qëndron jashtë, pra i lë në pavarësinë e tyre të gjitha organet e drejtësisë.
Si rezultat edhe i veprimtarisë së Kuvendit këto institucione, sado me vonesë, u ngritën nga Kuvendi, siç edhe e keni ndjekur. Kuvendi gjatë gjithë kohës ka plotësuar detyrimet e tij për sa u përket disa gjërave, siç janë: së pari, ligjet, nuk ka pengesa ligjore; së dyti, infrastruktura, nuk ka pengesë infrastrukture; strukturës së tyre, plotësimit në organikë, si dhe ka miratuar me shpejtësinë më të madhe burimet financiare, në mënyrë që ato të funksionojnë. Por jo vetëm kaq. Kuvendi, megjithëse pjesa që njeh ligji, bie fjala për KLGJ-në dhe KLP-në, që vinte nga sistemi i drejtësisë, pra nga prokurorët dhe gjyqtarët, u plotësua me vonesë, e ka plotësuar detyrën e tij për pjesën që i takon Kuvendit për anëtarët e KLGJ-së dhe të KLP-së, në mos gaboj, këtu e tetë muaj para, ashtu sikurse Këshilli i Emërimeve në Drejtësi u ngrit tani, por Kuvendi e ka plotësuar detyrimin e tij që kandidatët që ka Kuvendi janë në tavolinë dhe kanë pritur këtu e tetë muaj që të ngrihet Këshilli i Emërimeve në Drejtësi. Kështu që, unë mendoj se tashmë rruga është e hapur që Këshilli i Emërimeve në Drejtësi të merret menjëherë me çështjen e kandidaturave që duhet të shqyrtojë ky Këshill për të plotësuar vakumin e krijuar në Gjykatën Kushtetuese, sepse tashmë nuk ka asnjë pengesë. Presidenti i Republikës e ka kryer detyrën e tij. Sipas kompetencës që ka, kandidati i ka çuar atje, Kuvendi i ka çuar atje, Gjykata e Lartë i ka çuar atje, kështu që ata duhet të procedojnë sa më shpejt në mënyrë që të japin verdiktin e tyre. Nga ana tjetër, unë do të kërkoja që organet e vetingut të kenë prioritete sipas hierarkisë së sistemit të drejtësisë dhe të evidentojnë dhe të verifikojnë në radhë të parë kandidatët për në Gjykatën Kushtetuese, Gjykatën e Lartë, Inspektoratin e Përgjithshëm, prokuror të Përgjithshëm, SPAK-un, Byronë e Hetimit e kështu me radhë. Kështu që, ai objektiv që unë kam përcaktuar dhe që e lançova si një nga tre objektivat që ka Kuvendi në këtë sesion parlamentar, si rezultat i kooperimit dhe i bashkëpunimit me këto institucione, mendoj se është i realizueshëm, sigurisht pa u nxituar, në mënyrë që punët të bëhen siç duhet. Mund të themi se jemi në drejtimin e duhur.

Zoti Ruçi, Gjykata Kushtetuese ka rrëzuar disa nene të ligjit “Për organet e qeverisjes së sistemit të drejtësisë”, të cilat, ndër të tjera, prekin edhe vendimmarrjen e Këshillit të Lartë të Prokurorisë dhe Këshilli të Lartë Gjyqësor, të cilat nuk janë amenduar akoma nga Kuvendi. Pse nuk po amendohen këto nene dhe çfarë ka ndër mend të bëjë Kuvendi për nenet e rrëzuar?

Ju kuptova. Kjo është një pyetje shumë interesante që lidhet drejtpërdrejtë me Kuvendin. Është një detyrë e paplotësuar dhe ju keni plotësisht të drejtë. Është një punë që ka filluar kohë më parë në Kuvendin e Shqipërisë dhe nuk është lënë në harresë. Si detyrim kushtetues, është Këshilli i Legjislacionit që duhet të merret me këtë çështje. Janë zhvilluar disa mbledhje, por ende nuk ka dhënë produktin siç duhet. Për mendimin tim është një vonesë e pajustifikuar për mungesë të vullnetit politik dhe një detyrë shtëpie që Kuvendi duhet ta përmbushë. Pyetja juaj është një indicie më shumë për mua për ta vënë në rrugën e zgjidhjes sa më shpejt.

Në hapësirën shqiptare ka një debat për korrigjimin e kufijve të Kosovës, që cilësohet si copëtim i Kosovës. Nga qeveria shqiptare ka një paqartësi për marrëveshjen Serbi-Kosovë. Sipas jush, cili do të jetë qëndrimi i shtetit shqiptar për këtë marrëveshje? Faleminderit!

Meqë mbaruam me punët brenda shtetit, do të fillojmë me rajonin, më pas me Europën e më pas do të shkojmë në oqean. Dakord? Ju keni të drejtë që pyesni, sepse ky është një shqetësim real, i cili është bërë objekt diskutimi në jetën politike mbarëshqiptare dhe në Shqipëri. Unë nuk dua të bëhem pjesë e këtij debati. Shpeshherë, ne pozojmë duke thënë se kush është pro dhe kush është kundër. Së pari, Kosova është një shtet sovran, që ka institucionet e veta. Ne, si shqiptarë, si institucione të shtetit shqiptar, duhet ta respektojmë, duhet të mirëkuptojmë dhe të mbështesim zgjidhjet që duhet të japin institucionet e shtetit sovran të Kosovës. Së dyti, ajo që ne rekomandojmë apo që kemi si qëndrim është ky: në radhë të parë, institucionet e shtetit sovran të Kosovës duhet të kenë një mendim unik; në radhë të dytë, partitë politike në Kosovë të kenë një mendim unik për këtë çështje. Së treti, për institucionet e Kosovës rruga e zgjidhjes së problemeve të Kosovës është rruga e dialogut si mjet. Së fundi, institucionet e shtetit sovran të Kosovës, çfarëdolloj produkti që do të kenë, duhet ta kenë të konsultuar me Brukselin dhe me SHBA-në. Ky është mendimi dhe qëndrimi im për këtë çështje.