Monika Kryemadhi: Jam kërcënuar nga grupet kriminale

Në studion e “Open”, Monika Kryemadhi ka deklaruar se është kërcënuar në rrjetet sociale nga persona të cilët i ka identifikuar si anëtarë të grupeve kriminale të lidhura me politikën.

“Vajzën e vogël, e kam dërguar në shkollë jashtë me konvikt e izoluar, sepse nuk dua që ajo të rrezikojë, sepse duhet të garantoja jetën e vajzës. Unë jam kërcënuar në rrjetet sociale, e jo vetëm”, u shpreh ajo, duke shtuar se edhe pse ka kontaktuar me policinë nuk ka besim në sistemin e drejtësisë në Shqipëri, e po mundohet t’i zgjidhë vetë këto çështje.

Më tej ajo shprehet se Meta nuk do që të shprehet rreth kësaj çështje.

“Nëse Meta do të ishte më i vërtetë me publikun do të ishte më i mirë, por për të është më i rëndësishëm imazhi i institucionit sesa loja politike”, tha ajo.

“Jeta e një politikane mund të duket e bukur, por edhe ajo është e vështirë. Do të doja që të isha Zonjë e Parë, e besoj do ta bëja mirë këtë rol, por dua që të qëndrojë LSI deri sa të rinjtë të jenë gati për ta drejtuar”, u shpreh Kryemadhi.

Kryemadhi tregon se grupe kriminale kanë kërcënuar atë dhe vajzën e saj në rrjete sociale. Sipas saj, kjo ka qenë dhe arsyeja pse ka vendosur që ta dërgojë të bijën në një kolegj të mbyllur, ndonëse vajza e saj është ende vetëm 13 vjeç dhe e ka tepër të vështirë të qëndroj larg e vetme.

Teksa ka treguar këtë, Kryemadhi është përlotur, megjithatë tregon se nuk do të tërhiqet dhe nuk trembet përpara asgjëje.