7 pyetje kryeministrit Rama nga Vetëvendosje

Ndërkohë që në vend zien debati pas mosdekretimit të Gent Cakaj si ministër i Jashtëm, vendim që ka ashpërsuar përplasjen në distancë mes kryeministrit dhe presidentit Ilir Meta, aktivistja e “Vetëvendosjes” Dejona Mihali, i është drejtuar sot me 7 pyetje kreut të qeverise së Shqiperisë, njëherësh kreu i Partisë Socialiste. 

Pjesë e pyetjeve është padyshim edhe letra që analisti Baton Haxhiu i kishte adresuar Metës, duke i kërkuar të mos e shtyjë më tej gabimin për mosderektimin e të zgjedhurit të Ramës për ministër të Jashtëm.

“Pse je kaq i sigurtë në personazhe të errët si Hashim Thaçi dhe Baton Haxhiu dhe vë në dyshim ministrin dhe anëtarin e kryesisë së PS, z. Ditmir Bushati?”- pyet ajo, kryeministrin Rama.

Postimi i Dejona Mihalit

Ca pyetje kryeministrit dhe kryetarit të partisë socialiste të Shqipërisë:

1. A e di gjë pse 23 anëtarë të kryesisë së PS dhe 73 deputetë të PS + qindra kryetarë degësh, nëndegësh dhe mijëra bashkëpunëtorë profesionalë socialistë nuk dalin të reagojnë por del Baton Haxhiu?

2. Pse je kaq i sigurtë në personazhe të errët si Hashim Thaçi dhe Baton Haxhiu dhe vë në dyshim ministrin dhe anëtarin e kryesisë së PS, z. Ditmir Bushati?

3. Nëse ka diçka të papranueshme në Ministrin e jashtëm aktual a mund t’ia tregosh të gjithë shqiptarëve, me këtë rast dhe socialistëve anëtarë, simpatizantë dhe votues ?

4. Nëse Ilir Meta është i paditur pse na e propozove dhe pastaj votove për President të Republikës së Shqipërisë?

5. Nëse je kundër shkëmbimit të territoreve , e thënë shqip, pra kundër ndarjes së Kosovës sipas planit të Vuçiçit a mund ta thuash këtë prerazi pa ekuivoke?

6. Nëse pretendon se e njeh G. Cakajn atëherë pse nuk ia keni bërë certifikatën e sigurisë nga drejtoria në vartësi tuajën që prej se e kishit këshilltar ?

7. Që kur këshilltarët e tu, mandej zëvendësministra, e të propozuar për ministër të jashtëm si Gent Cakaj lejohen të nxjerrin në emisione televizive të Baton Haxhiut për 1 vit rresht komentet e sqarime nga takimet e tua nga ai me Kancelaren Merkel deri te ato brenda zyrave të këshillit të ministrave e tek kualifikimet e sulmet mbi subjektet politike në Kosovë?