Refuzimi i Cakajt si ministër, Gjata: Vendim kushtetues dhe ligjor, Meta autoritar

Konstitucionalisti Çlirim Gjata është shprehur për Report Tv se refuzimi i emërimit të Gent Cakajt si ministër i Jashtëm nga ana e presidentit Ilir Meta dëshmon se nuk është rast që mund të cilësohet si lojë politike, pasi është ndërmarrë me të drejtë kushtetuese e ligjore.

Gjata cilësoi se presidenti Meta ka shkuar shumë më tej me këtë vendim, pasi kësaj radhe vendimi i tij karshi Cakajt janë bërë publike.

“Ai person mund të jetë i ndershëm, por ama duhet ndjekur rruga shtetërore dhe këtë gjë bëri edhe presidenti Ilir Meta. Më në fund po shohim një president që po sillet me autoritet”, u shpreh më tej ai.

Konstitucionalisti përmendi më tej edhe kriterin kryesor për të cilën hodhi poshtë propozimin e kryeministrit Rama, certifikatën e sigurisë, që Cakaj e mori tre ditë pas firmosjes së propozimit për detyrën e re.

“Figurat shtetërore gëzojnë atë që quhet certifikatë sigurie sepse shtetet kanë marrëdhëniet e veta midis radhëve të tyre, në kuptimin që mund të marrin vesh ose kanë të drejtë të dinë sekrete të ndryshme, por ama të mos dalë jashtë zyrave. Nuk bëhet fjalë për një certifikatë civile”,komentoi  Çlirim Gjata.

Gjata renditi si argument ndaj refuzimit të emërimit të Gent Cakajt në krye të Ministrisë së Jashtme edhe qëndrimin e tij përkundrejt kufirit territorial Kosovë-Serbi.

“Presim që në qershor të hapim negociatat me Bashkimin Evropian. Është një moment mjaf delikat. Ai deklaroi se duhet parë rishikimi i kufirit territorial Kosovë-Serbisë, është një deklaratë mjaft e rrezikshme. Ndonëse propozimi i  tij bie poshtë, deklarata mbetet. Nëse duhet të hyjmë në Europë, duhet të jemi seriozë”,  u shpreh konstitucionalisti  Çlirim Gjata.