Ylli Rakipi zbulon se tenderi 18 milionë euro te Unaza e Re rezulton me dokumenta fallso

Pas zbulimit të skandalit të falsifikimit të dokumenteve të një prej firmave që ka fituar tenderin për ndërtimin e Unazës së re është pezulluar puna në këtë segment.

Ky skandal u zbulua nga Ylli Rakipi në emisionin “Te Paekspozuarit” në news24.

Vendimi i pezullimit ka ardhur nga Autoriteti Rrugor Shqiptar, pasi mbrëmë u publikuan dokumentat e fitimit të tenderit, të cilat janë fallso e me firmë gjoja nga sekretari i shtetit i Shtetit të Delaware (SHBA), Jeffrey Bullock.

Një veprim mafioz dhe shumë i guximshëm i kësaj firme që ka fituar 18 milionë euro, por që pa patur mbështetjen qeveritare nuk ka mundur t’i bëjë këto veprime mashtruese.

Prokuroria duhet urgjent të fillojë hetimin dhe arrestimet ndaj personave mashtrues e përgjegjës, të cilët bënë letra fallso nga SHBA që të vidhnin 18 milionë euro nga buxheti i shtetit shqiptar.

Kjo çështje ka nevojë për pranga!

Autoriteti Rrugor nuk mund të justifikohet me njoftimin e mëposhtëm, të cilin gjithsesi për hir të transparencës dhe informimit po e japim të plotë, porse asnjeri nuk bind në këtë justifikim, ku flitet për 18 milion euro vjedhje e pastër.

Prangat e prokurorisë bindin në këtë rast për të vendosur drejtësi!

Njoftimi i Autoriteti Rrugor Shqiptar:

Autoriteti Rrugor Shqiptar u vu në dijeni të materialit të transmetuar mbrëmjen e djeshme në emisionin “Të Paekspozuarit” në televizionin News 24 për garën e zhvilluar për njërin prej 3 loteve të projektit të Unazës së Madhe të Tiranës, segmenti Pallati me Shigjeta-Sheshi Shqiponja.

Në kuadër të transparencës ndaj opinionit publik, Autoriteti Rrugor Shqiptar sqaron sa vijon:

Procedura e prokurimit është zhvilluar në përputhje me ligjin Nr.9643, datë 20.11.2006 “Për Prokurimin Publik”, i ndryshuar, VKM-së Nr.914, datë 29.12.2014 “Për miratimin e rregullave të Prokurimit Publik” e ndryshuar. Kjo procedurë bazuar në detyrimet ligjore të mësipërme, është procedurë e hapur, e zhvilluar në mënyrë elektronike përmes Agjencisë së Prokurimeve Publike.

Autoriteti Kontraktor ka nënshkruar kontratën me bashkimin e përkohshëm të operatorëve ekonomik “Biba X shpk” dhe “DH Albania shpk- degë e shoqërisë së huaj”, pasi ka konstatuar që dokumentet janë në përputhje me kriteret e dhëna në dokumentet e tenderit. Operatori ekonomik “DH Albania shpk- degë e shoqërisë së huaj”, pjesë e këtij bashkimi, ka paraqitur dokumentacionin të përkthyer dhe të noterizuar në gjuhën shqipe, ku kompania mëmë “Dunwell Haberman” rezulton e regjistruar dhe ushtron aktivitetin në një prej shteteve të Shteteve të Bashkuara të Amerikës, konkretisht në shtetin Delaware.

Në përmbushje të kritereve të dhëna në dokumentet e tenderit ka bërë regjistrimin në Qendrën Kombëtare të Bizneseve dhe njësimin e licencës duke respektuar Vendimin e Këshillit të Ministrave Nr.42 datë 16.01.2008, “Për miratimin e rregullores për kriteret dhe procedurat e dhënies së licencave profesionale të zbatimit, klasifikimit dhe disiplinimit të subjekteve juridike që ushtrojnë veprimtari ndërtimi”. Njësimi i saj ka konkluduar me një nivel maksimal të licensimit, bazuar në veprimtarinë ekonomike të saj në vendin e origjinës, duke mbajtur kategoritë maksimale (kategoria G).

Autoriteti Rrugor Shqiptar nuk ka patur ndonjë indicie që vë në dyshim vërtetësinë e dokumentave të paraqitura e cila do mund të çonte në një procedurë verifikimi paraprak.

Kontrata e nënshkruar me këtë bashkim operatorësh në fjalë për këtë lot të Unazës nuk ka prodhuar asnjë efekt financiar për Buxhetin e Shtetit.

Në funksion të sqarimit të plotë të situatës dhe pretendimeve të shfaqura në emisionin “Të Paekspozuesit”, janë ndërmarrë këto veprime:

1. ARRSH i është drejtuar institucioneve që përmes komunikimit me rrugë zyrtare tu kërkohet autoriteteve të Shteteve të Bashkuara të Amerikës për të verifikuar dokumentet e paraqitura në institucionet shqiptare nga kompania në procedurën e garës.

2. Deri në sqarimin e situatës dhe përgjigjen nga autoritetet amerikane nuk do të vijohet me aktivitetin ndërtimor të kësaj kompanie për lotin Nr.1 të segmentit, që shtrihet nga Ura e Lanës deri tek mbikalimi i sheshit Shqiponja.

3. Në rast se autoritetet amerikane do të konfirmojnë zyrtarisht pretendimet për falsifikime dokumentacioni nga kjo kompani, në zbatim të përcaktimeve ligjore, Autoriteti Rrugor Shqiptar do të zgjidhë kontratën në mënyrë të njëanshme dhe do ndjekë procedurat e tjera të përcaktuara në ligj. Në rast të zgjidhjes së kontratës, ARRSH do të rifillojë menjëherë procedurat e prokurimit për këtë lot për të mundësuar përfundimin në kohë të këtij projekti të rëndësishëm për kryeqytetin.

Autoriteti Rrugor Shqiptar garanton opinionin publik se është i vendosur të mbrojë maksimalisht interesat e shtetit shqiptar duke zbatuar përcaktimet ligjore për çdo situatë të tillë. (ARRSH)

Pas njoftimit të ARRSH-së gjoja për të pezulluar punimet në një nga segmentet e Unazës së re, ka reaguar edhe deputeti i PD-së, Agron Shehaj.

Me një shënim në Facebook, Shehaj thotë se kjo është një manovër mashtruese për të shpëtuar hajdutët e vërtetë.

Shehaj kërkon hetimin e Edi Ramës dhe Erion Veliajt për këtë megaskandal që pritet të përfshijë në hetim edhe autoritetet në SHBA.

Reagimi i Agron Shehajt:

Vendimi i sotem i ARRSH-se eshte nje manover mashtruese per te shpetuar hajdutet. Drejtori i ARRSH-se dhe i gjithe stafi drejtues duhet te pezullohen menjehere nga detyra dhe te merren nen hetim menjehere nga prokuroria.

Te gjitha dokumentat e tenderit dhe te projektit duhet te sekuestrohen menjehere qe te mos manipulohen dhe tjetersohen. Keto jane veprimet me minimale.

Hetimi duhet te perfshije edhe kompanite Edi Rama Invest dhe Erion Veliajn Invest qe jane autoret dhe perfituesit e kesaj megavjedhjeje.