Takimi në Presidencë, Rama: Duhen zgjedhje normale, jo formale

Zv/kryetari i LSI-së, Luan Rama ka folur për mediat pas takimit që zhvilloi në Presidencë për datën e zgjedhjeve lokale të vitit 2019-të.

Pas takimit me Presidentin e Shqipërisë, Ilir Meta, Rama theksoi se vendi ka nevojë për zgjedhje normale dhe jo thjeshtë formale. Ai theksoi se problemet kryesore në vend burojnë për shkak të kriminalizimit të zgjedhjeve.

“Nuk ka nevojë për zgjedhje formale, por për zgjedhje normale. Publiku e sheh se çfarë po ndodh me qeverisjen dhe kur qeverisja detyrohet t’i kthejë reston krimit”, u shpreh Rama.

Prononcimi për mediat i Zëvendëskryetarit të LSI-së, Luan Rama pas takimit me Presidentin e Republikës së Shqipërisë

Në emër të Lëvizjes Socialiste për Integrim unë ndava me Presidentin e Republikës shqetësimin që nuk është vetëm i LSI-së dhe nuk është vetëm i opozitës, por i të gjithë shoqërisë shqiptare që problemi i zgjedhjeve në Shqipëri nuk është data. Problemi i zgjedhjeve në Shqipëri është standardi i tyre, cilësia e tyre dhe ajo çfarë është më e rëndësishmja, është pastrimi i zgjedhjeve nga interferenca, ndikimi, lobimi dhe trafikimi e blerja  prej grupeve kriminale.

Problemi më i madh që ka shoqëria shqiptare që prej pluralizmit demokratik në fakt ka qenë kriminalizimi i zgjedhjeve, dhe prej këtej pastaj burojnë të gjitha të këqijat e tjera siç është praktikisht edhe situata në gjendje kolapsi e funksionimit të institucioneve të shtetit.

Një pushtet që buron nga veprimtaria kriminale dhe lobimi kriminal, natyrisht nuk mund të bëjë tjetër veçse do t’u kthejë reston grupeve kriminale.

Ky është shqetësimi i madh, ky është problemi i madh dhe për sa kohë nuk ka vëmendjen, vlerësim dhe angazhim të qeverisë për të pastruar, ajo e para veten dhe pastaj edhe zgjedhjet nga krimi, gjithçka tjetër pastaj është formale.

Qëndrimi i Presidentit për gjithçka që ju i raportuat?

Unë jam këtu dhe flas për qëndrimin e LSI-së dhe për atë se çfarë unë i kam thënë Presidentit të Republikës, dhe nuk mund të bëhem zëdhënës i Presidentit.

Kur ju thoni formale, ju do të merrni pjesë në zgjedhje formalisht?

Më lejoni ta shpjegoj që ta kuptoni që ky vend i mbytur nga informaliteti dhe kriminaliteti, nuk ka nevojë për zgjedhje formale, por ka nevojë për zgjedhje reale dhe për zgjedhje që të garantojnë përfundimisht shprehje të vullnetit qytetar dhe jo shprehje të vullnetit të grupeve kriminale. Më qartë se kaq dhe më shqip se ka , nuk ka se ç’të them tjetër pasi ju po e shihni vetë, publiku po e sheh vetë se çfarë ndodh me qeverisjen dhe çfarë ndodh kur qeverisja është e detyruar t`i kthejë reston krimit.