Ikja e Xhafajt, Bylykbashi: Edi Rama është peshkaqeni që po qelb të gjithë tepsinë

Valës së reagimeve që shkaktoi këtë të shtunë dorëheqja e papritur e Fatmir Xhafajt nga posti i ministrit të Brendshëm i është bashkuar edhe deputeti i Partisë Demokratike, Oerd Bylykbashi.

Përmes një komenti në faqen e tij zyrtare në rrjetin social “Facebook”, Bylykbashi shprehet se përtej këtij largimi, Edi Rama është peshkaqeni që po qelb të gjithë tepsinë e pushtetit.

Reagimi i plotë i Oerd Bylykbashit

Vetting për peshqit e mëdhenj të qelbur!‎

Në fillim ikën Habilajt me gjithë Tahir, më pas Bajrot, më pas Avdylajt‎, tani Xhafajt. Ç’ka thënë opozita po del e vërtetë. Aleanca e Qelbësirave, siç e quajti një ideolog i saj dikur në 2013-ën, po shkërmoqet në mes të panikut. Sa shkel njeri syrin dhe njofton konferencë shtypi, apo thotë shprehje me kod në TV dhe ja ku ikën ministër, apo deputet. ‎Dhe ky është vetëm fillimi i shkërmoqjes. Prisni të shihni të radhës!

‎Marrëveshja me krimin është marrëveshje me djallin. Herët a vonë të ha kokën!

Deri më sot po binin në rrjetë peshq të vegjël të qelbur. Sot ra një peshk i madh. ‎Por siç e thotë një shprehje e vjetër durrsake: “Kur man erë bishti i peshkut, koka është qelb kahone!”. Dhe durrsakët këto historitë me “peshq” i njohin mirë.

‎Edi Rama është peshkaqeni që po qelb të gjithë tepsinë. Duhet hedh me gjithë tepsi sa nuk është qelbur shtëpia përfundimisht!