Fotografi i panjohur dhe i harruar i Kolonjës: “Hëmbëltore, orëndreqës dhe fotografia”!

Dhimitër Vangjeli (8 shtator 1872 – 1 prill 1957), nga Prodani i Kolonjës, është një emër thuajse i panjohur në historinë e fotografisë shqiptare. Por, fotot e tij gjenden të pasqyruara në botimet e rëndësishme të kohës.

Në regjistrat tregtare të fillim shekullit të XX, Kolonja nuk rezulton të ketë pasur ndonjë fotograf. Vangjeli ishte i regjistruar si sheqerxhi. Megjithatë, është gjetur tabela e dyqanit të tij ku shkruhet “Hëmbëltore, orëndreqës dhe fotografia”. Pra, në sajë të pasionit për fotografinë, e shndërroi dyqanin në një laborator fotografik, por jo në studio. Me aparatin fotografik në krah, regjistronte momente të veçanta në të gjithë fshatrat e Kolonjës, që nga lindjet, pagëzimet, martesat e deri te ceremonitë mortore.

Në fundin e viteve 1960, një fond prej 1300 fotosh u mor në ruajtje nga bashkia pasi rrezikonte të shkatërrohej.

Megjithatë, nuk u regjistrua si fond në inventarët e muzeut apo bashkisë dhe askush nuk e vlerësoi apo studioi, kështu që mbeti i mbyllur në një valixhe të vjetër dhe arkë municionesh duke u njohur vetëm nga një grup i vogël njerëzish.

Kaloi shumë kohë sa u përhapën legjenda nëse ekzistonte vërtetë arkivi apo jo.

Foto janë publikuar më vonë në albumin ‘Kolonja përmes fotografisë së Dhimitër Vangjelit”. /27/Telegrafi/