Hapet burgu i ri në Reç të Shkodrës, zgjidh problemin e mbipopullimit

Burgu i Reçit në qarkun e Shkodrës është gati për të nisur nga puna. Ai është përuruar ditën e enjte me një ceremoni në të cilën kanë marrë pjesë Ministrja e Drejtësise, znj. Etilda Gjonaj, ambasadorja e delegacionit të BE, znj.Romana Vlahutin, deputetë të zonës dhe të Komisionit të Sigurisë, prefekti i Shkodrës, kryetari i bashkisë së Malësisë së Madhe, shefi i zyrës së KiE dhe përfaqësues të shoqërisë civile që punonjnë në fushën e mbrojtjes së të drejtave të njeriut.

Ky institucion është ndërtuar me bashkëfinancimin e Bashkimit Europian me një vlerë prej 14,37 milion Euro dhe Qeverisë Shqiptare me 4 milion Euro. Ai ka një kapacitet prej 780 të dënuarish dhe të paraburgosurish.

Ministrja e Drejtësisë, znj.Etilda Gjonaj në fjalën e saj theksoi se hapja e këtij institucioni do të ndikojë në mënyrë të ndjeshme në uljen e fenomenit të mbipopullimit në sistemin e burgjeve, çka është aktualisht një nga problematikat më të mprehta në sistemin penitenciar.

Sipas ministres Gjonaj përmirësimi i infrastrukturës është një shtyllat kryesore të reformës në burgje dhe për këtë arsye Qeveria ka rritur me 10% nivelin e investimeve që do të realizohen gjatë vitit 2018, duke e çuar kështu në 470 milionë lekë buxhetin e investimeve.

Duke folur për reformën në sistemin penitenciar Ministrja e Drejtësisë u shpreh: “Reforma në sistemin penitenciar, si pjesë e rëndësishme e reformës së madhe në drejtësi që ne kemi ndërmarrë me shume sukses është në drejtimin e duhur. Synimi është krijimi i një sistemi penitenciar të sigurt, profesional, larg ndikimeve politike, në respekt të të drejtave të njeriut dhe sigurisht që t’i përshtatet kërkesave të kohës për të qenë në lartësinë e duhur për rehabilitimin dhe riintegrimin e të dënuarve në shoqëri”.

Një tjetër drejtim i rëndësishëm i reformës në të cilin është ndalur ministrja Gjonaj janë edhe masat antikorrupsion brenda sistemit të burgjeve. Ministrja tha se po forcohen masat antikorrupsion, nëpërmjet forcimit të Shërbimit të Kontrollit të Brendshëm të Burgjeve që kontrollon dhe verifikon veprimet e administratës për të gjitha rastet e abuzimit të detyrës dhe shkeljes së ligjit. Sipas saj një numër i lartë punonjësish të policisë së burgjeve janë kallzuar penalisht në rastet kur janë adresuar raste të ankesave për korrupsion ashtu si dhe në rastet e hetimeve proaktive për mitmarrje dhe favorizim të të burgosurve.

Nga ana e saj ambasadorja e Delegacionit të Bashkimit Europian, znj.Romana Vlahutin u shpreh: “Sundimi i ligjit është në thelb të partneritetit dhe dialogut tonë politik dhe është po aq në qendër të mbështetjes që Bashkimi Europian i jep Shqipërisë. Është në thelb të asaj që qytetarët shqiptarë kërkojnë nga autoritetet.

Kjo strukturë është një shembull i shkëlqyer se si bashkëpunimi mes Bashkimit Evropian dhe fondeve kombëtare të Shqipërisë kanë bërë të mundur një projekt të tillë, një institucion të standardeve evropiane, i cili do të mundësojë mbrojtjen më të mirë të dinjitetit njerëzor të të burgosurve”

Burgu i ri në Reç të qarkut Shkodër plotëson të gjitha kushtet dhe standardet e trajtimit të personave të paraburgosur dhe të dënuar. Ato i përafrohen standardeve të Bashkimit Evropian, në lidhje me akomodimin, sistemet e ngrohjes, regjimin e aktiviteteve ditore, aktiviteteve sociale, kulturore, edukimit, si dhe atyre sportive etj.

Gjithashtu ky institucion ka në dispozicion ambiente për reparte pune për punësimin e të burgosurve, kushte bashkëkohore të kuzhinës, lavanderisë, ambiente të kujdesit shëndetësor, si ndihma e shpejtë, urgjencë, farmaci, etj.