Nyja e Milotit, nisin punimet – Gjiknuri: Investim 1.6 mld lekë, përfundon për 15 muaj

1.6 mld lekë do të jetë investimi i qeverisë shqiptare për përfundimin e punimeve në nyjen e Milotit, e cila është konsideruar një pikë strategjike për trafikun pasi lidh Rrugën e Kombit me aksin që shkon nga Tirana drejt Shkodrës. Teksa inspektoi nisjen e  punimeve, ministri i Infrastrukturës dhe Energjisë, Damian Gjiknuri tha se prej muajit gusht nyja do të bëhet funksionale, duke synuar lehtësimin e trafikut të mjeteve gjatë sezonit turistik.

“Edhe gjatë kësaj vere, gjithë pushuesit do ta ndjejnë diferencën e madhe që do të ketë lehtësimi i trafikut pikërisht në këtë nyje. Kjo është një nga ato veprat e tjera të rëndësishme që ne jemi duke hapur. Këtu do të jetë edhe lidhja me autostradën nga Miloti deri në Balldren”, u shpreh Gjiknuri.

Kreu i Autortiteti Rrugor Shqiptar, Afrim Qëndro bëri me dije se punimet pritet të përfundojnë tërësisht brenda 15 muajve.

 “Jemi në nyjen e Milotit. Ka pak ditë që është lidhur kontrata për përfundimin e punimeve të ngelura dhe plotësimin me rrugë dytësore për gjithë nyjen e Milotit. Është një vepër që ka shumë vite që ka filluar, kishin ngelur punimet të pabëra. Kjo nyje nuk mund të futej në shfrytëzim nëse nuk bëhej ky projekt i ri dhe kjo garë e re. E kemi nisur punën dhe përfundimisht brenda 15 muajve kjo nyje do të përfundojë me të gjitha zgjidhjet e plota teknike”, tha Qëndro.

Përveç nyjes, ndërhyrja parashikon edhe rehabilitimin e 9 kilometra rrugë në gjithë zonën që është përreth saj.