Berisha: Mendoj 50 herë në ditë të largohem nga Kuvendi

Në një intervistë për Ora News, ish-kryeministri Sali Berisha tha se mendon 50 herë në ditë për lënien e mandatit të deputetit, duke theksuar se me reformën në drejtësi, çdo institucion tjetër është bërë fiktiv.

Zoti Berisha, me gjithë këto probleme që ju listoni për mazhorancën, a vazhdoni të mendoni dhe keni si opsion djegien e mandateve?

Berisha: Unë gjykoj që kolapsi i plotë i reformës në drejtësi ka bërë çdo institucion tjetër fiktiv në këtë vend dhe të gjitha pushtetet i kanë kaluar Edi Ramës. Jo një herë, por të paktën 50 herë në ditë, unë mendoj që se pse rri në atë Parlament dhe nuk e di se cili do të jetë vendimi. Unë do të respektoj vendimet e opozitës. Por në kushtet e asgjësimit të drejtësisë dhe shndërrimit të saj në një degë të ekzekutivit, Parlamenti është një institucion i terrorit të pushtetit të Edi Ramës dhe një institucion që nuk meriton as 4 minuta të ekzistojë.

Do e propozosh sërish në grup?

Berisha: Unë them që grupi nuk ka pse të ndikohet nga unë. Grupi merr vendimet e veta, nuk ka pse ndikohet nga unë.