Ulet numri i studentëve, ja shkaqet që rinia është jashtë Universiteteve

Numri i studentëve në arsimin e lartë këtë vit akademik ka arritur nivelin më të ulët të viteve të fundit. Ky është viti i katërt radhazi që numri i studentëve në universitete pëson rënie. Rënia ka nisur pasi qeveria e majtë vendosi në vitin 2013 mbylljen e disa prej universiteteve private që nuk plotësonin kriteret ligjore. Gjithashtu, pjesë e strategjisë për arsimin ka qenë frenimi i dyndjes në universitete dhe promovimi i arsimit profesional, për t’iu përgjigjur më mirë nevojave të tregut të punës.

Vitet e fundit kanë sjellë një përmbysje të tendencës së masivizimit të arsimit të lartë të nisur në mesin e viteve 2000, falë hapjes së shumë universiteteve private pa filtra cilësorë të pranimit të studentëve.

Mungesa e kontrollit mbi këto universitete solli diploma pa besueshmëri në tregun e punës, ndërsa mungesa e një orientimi të qartë për tendencat e tregut të punës shkaktoi rritje masive të të diplomuarve në shkencat shoqërore.

Qeveria dhe përfaqësues të sipërmarrjes këmbëngulin se tregu ka më shumë nevojë për zanatçinj dhe kjo ka rritur promovimin e arsimit profesional. Në fakt, edhe në arsimin e mesëm profesional numri i nxënësve në tre vitet e është pothuajse i pandryshuar pranë nivelit 25 mijë.

Megjithatë, kjo mund të quhet një tendencë pozitive në raport me pjesën tjetër të arsimit. Në të gjitha nivelet e arsimit, duke filluar nga ai fillor, numri i nxënësve është në rënie vit pas viti.

Kjo lidhet në radhë të parë me tendencat demografike. Ulja e lindjeve po pakëson numrin e nxënësve në shkolla, ndërsa gradualisht pritet të sjellë pasoja edhe në tregun e punës dhe në ekonomi.  /Scan/