Presidenti Ilir Meta uron besimtarët myslimanë për Muajin e Ramazanit

Presidenti Republikës, Ilir Meta ka uruar sot besimtarët myslimanë me rastin e nisjes së Muajit të Ramazanit.

Në një mesazh në profilin zyrtar në facebook, kreu i shtetit shprehet se ky muaj i rëndësishëm për myslimanët është një moment reflektimi dhe solidariteti. “Ky Muaj i madhërishëm, që lartëson shpirtin e kthjellon mendjen, uroj të sjellë më shumë dashuri për njëri-tjetrin, paqe sociale dhe besim. Solidaritet për ata që kanë nevojë për përkujdesje, për të qenë bashkë në ditë të mira e në ditë të vështira, në dhimbje dhe në gëzime”,- shprehet Presidenti Ilir Meta në mesazhin e tij.

Mesazhi i plotë i kreut të shtetit:

“Të dashur besimtarë myslimanë,

Gëzuar Muajin e Bekuar të Ramazanit, muajin e sakrificës dhe të reflektimit! Ky Muaj i madhërishëm, që lartëson shpirtin e kthjellon mendjen, uroj të sjellë më shumë dashuri për njëri-tjetrin, paqe sociale dhe besim. Solidaritet për ata që kanë nevojë për përkujdesje, për të qenë bashkë në ditë të mira e në ditë të vështira, në dhimbje dhe në gëzime. Agjërim të lehtë dhe të shëndetshëm, mbarësi dhe begati në familjet tuaja! Zoti ju ndihmoftë për ta përmbushur më së miri atë!

Zoti ju bekoftë ju, familjet tuaja, Shqipërinë dhe mbarë kombin shqiptar!”.