Haradinaj: Serbia duhet të përgjigjet dhe të japë llogari për personat e pagjetur

Kryeministri i Kosovës, Ramush Haradinaj, teksa mori pjesë në homazhe te Përmendorja kushtuar personave të zhdukur deklaroi se Serbia duhet përgjigjet për personat e pagjetur dhe të jap llogari.

“Java e të Pagjeturve na rëndon dhe na sjellë vuajtje dhe dhembje për mijëra qytetarët, fati i të cilëve ende nuk është zbardhur nëntëmbëdhjetë vjet pas lufte. Institucionet e Kosovës nuk do të reshtin së kërkuari të pagjeturit dhe drejtësi për viktimat e luftës. Plagët e konfliktit të fundit nuk mund të mbyllën dhe nuk mund të ketë paqe të qëndrueshme pa ndriçimin e plotë të të vërtetës së luftës në Kosovë. Kosovës i mungojnë njerëzit e saj, për të cilët shteti serb duhet të përgjigjet dhe të jap llogari”, tha Haradinaj.

Zyra e Kryeministrit Ramush Haradinaj do të shënojë “Javën e Personave të Pagjetur”, që nis më 23 prill dhe do të vazhdojë deri më 27 prill.

Më poshtë gjeni axhendën e Qeverisë për këtë ngjarje:
Më 23 prill 2018, ora 09:00, do të fillojnë aktivitetet me vendosjen e luleve të përmendorja dedikuar personave të zhdukur (përballë Kuvendit të Republikës së Kosovës);
Më 24 prill 2018, do të vizitohen dhe realizohen takime me familjarët e personave të zhdukur, nga Komuna e Fushë Kosovës dhe Komuna e Obiliqit;
Më 25 prill 2018, do të vizitohen dhe realizohen takime me familjarët e personave të zhdukur, nga Komuna e Vushtrrisë;
Më 26 prill 2018, do të realizohen aktivitete lokale në nderim dhe përkujtim te të gjithë personave të zhdukur dhe të rënëve për lirinë e vendit;
Më 27 prill 2018, duke filluar nga ora 12:00, mbahet Tubimi Qendror Përkujtimor, në Kompleksin Memorial në Mejë, Komuna e Gjakovës.
Edhe pas 19 vitesh pas përfundimit të luftës së fundit në Kosovë, ende nuk dihet për fatin e mbi 1600 personave të zhdukur.