Pas Metës, artistët e Teatrit Kombëtar takim me Bashën

Edhe pse kryeministri Edi Rama ndërtimin e Teatrit të ri Kombëtar e ka bërë fakt të kryer, artistët kanë ende shpresë për një zgjidhje ndryshe të kësaj situate. Pas takimit me Presidentin Ilir Meta, ditën e sotme një përfaqësi e tyre do të takohet, edhe me kreun e opozitës Lulzim Basha.

Ky është takimi i parë mes tyre ndërsa vetëm pak ditë më parë, një grup artistësh iu bashkuan edhe protestës së familjarëve të të arrestuarve si pasojë e incidenteve në protestën kundër tarifimit të Rrugës së Kombit.

Pak ditë më parë, me kërkesë të tyre, një përfaqësi artistësh, të kryesuar nga aktori i njohur Robert Ndrenika, zhvilluan një takim edhe me Presidentin Meta.

Ata e njohën Presidentin Meta me shqetësimin e tyre dhe të komunitetit të artistëve lidhur me problemin e godinës së Teatrit Kombëtar, që është kthyer së fundmi në një debat publik. Nga ana e tij, Presidenti Meta, theksoi rëndësinë e dialogut të vazhdueshëm e të transparencës për këtë çështje, në dobi të ruajtjes e promovimit të vlerave e trashëgimisë historike, kulturore e kombëtare.

Nuk dihet nëse edhe Basha do të jetë me mesazhe, po kaq paqësore sa Meta, apo do të kërkojë radikalizim të protestës nga ana e artistëve.