Ministri Fatmir Xhafaj lavdërohet nga Komisioneri i BE, Avramolupos

Ministri më i rëndësishëm i kabinitetit qeveritar Xhafaj ndodhet në Bruksel. Ministri i Brendshëm Fatmir Xhafaj takoi në Bruksel Komisionerin për Migrimin, Punët e Brendshme dhe Shtetësinë, Dimitris Avramolupos. Ministri shqiptar ndodhet para një sfide të madhe politike dhe personale. Politike si përfaqësues i PS për të spastruar elementin kriminal nga radhët e policisë dhe ndëshkimin e krimit dhe korrupsionit në vend, duke siguruar rend publik dhe drejtësi, si dhe nga ana tjetër si sfidë personale. Sfida personale lidhet nëse do të arrijë ministri Fatmir Xhafaj të përballet me krimin dhe politikën e krimit, siç ka treguar forcë e vullnet për reformën në drejtësi, por jo vetëm.

Prononcimi për mediat i Ministrit të Brendshëm Fatmir Xhafaj dhe Komisionerit për Migrimin, Punët e Brendshme dhe Shtetësinë, Dimitris Avramopoulos, pas takimit:

Komisioneri Avramopoulos: Zhvillova një takim me Ministrin e Brendshëm të Shqipërisë dhe një mik i mirë, me të cilin biseduam mbi të gjitha çështjet e lidhura me perspektivën europiane të Shqipërisë.

Shqipëria është një faktor i rëndësishëm stabiliteti për mbarë rajonin. Një fqinj i mirë i vendit nga i cili unë vij dhe, në të ardhmen, anëtar i familjes europiane.

Ndodhemi sot këtu për të punuar së bashku, në mënyrë që të kapërcejmë të gjitha çështjet dhe kërkesat që kërkohen për t’i hapur Shqipërisë dyert drejt Bashkimit Europian. Dhe ne jemi shumë të angazhuar të rrisim dhe thellojmë bashkëpunimin tonë, në mënyrë që të arrijmë këtë moment.

Ndaj sërish ju uroj mirëseardhjen, Z. Ministër! Jam i sigurt se do të kemi një bashkëpunim të shkëlqyer në të ardhmen në të gjitha nivelet.

Unë do të vijoj të mbështes dhe të jem krah Shqipërisë në rrugëtimin e saj drejt Bashkimit Europian.
Mirë se vini!

Ministri Fatmir Xhafaj deklaron: Ishte një kënaqësi e veçantë takimi me Komisionerin Avramolupos, sepse para së gjithash takova një mik shumë të mirë të Shqipërisë, i cili ka dhënë një mbështetje të jashtëzakonshme për shqiptarët në çështjet e integrimit të tyre.

Komisioneri është një mbështetës i madh i aspiratave të popullit shqiptar, të vendit tim drejt integrimit të mëtejshëm në Bashkimin Europian, por njëkohësisht është një mbështetës shumë i rëndësishëm për ne lidhur me çështjet e sigurisë dhe rendit publik në Shqipëri.

Unë shpresoj dhe besoj që nën kujdesin e tij, me mbështetjen e tij, ne do të bëjmë hapa të rëndësishëm që kanë të bëjnë me çështjet e luftës ndaj krimit të organizuar, trajtimit të çështjeve të emigracionit të paligjshëm dhe një sërë çështjesh të tjera që na preokupojnë në rrugën tonë në integrimin në Bashkimin Europian.

Unë shpresoj dhe besoj dhe kjo është një ftesë që dëshiroj t’ia bëj publikisht Komisionerit, që ai shumë shpejt të ketë mundësi të jetë në Tiranë për t’u njohur me rezultatet e gjithë këtij procesi dhe njëkohësisht me hapat e mëtejshëm që ne duam të hedhim në këto fusha të rëndësishme.

Komisioneri Avramopulos: Pikat kryesore të diskutimit tonë gjatë takimit të sotëm ishin sigurisht emigracioni, kriza e refugjatëve, lufta jonë e përbashkët kundër terrorizmit, radikalizimit, dhe kundër krimit të organizuar.

Dhe siç e thashë më parë, Shqipëria do të ketë mbështetjen tonë të plotë dhe do të kem kënaqësinë që të vizitoj Tiranën shumë shpejt.