Promocion i turizmit në gusht, Vasili ironizon Ramën: Kaq di, kaq bën

Artikujt e medieve të huaja për Shqipërinë, që i bëjnë reklamë turizmit në pikun e sezonit, për kreun e grupit parlamentar të LSI-së, nuk është zgjedhje e duhur.

Petrit Vasili, në një reagim në rrjetin social facebook, shkruan se në të gjithë botën promocionet dhe panairet turistike bëhen gjatë gjithë vitit por në Shqipëri vetëm në muajin korrik-gusht. “Gjithë bota i bën promocione, panaire turistike dhe reklamë turizmit gjithë vitin, me përjashtim të korrikut dhe gushtit”,-shkruan Vasili.

Këtë promocion në gusht, në të dalë të sezonit, për Vasilin tregon edhe njëherë se “në krye të qeverisë është një kryeministër shkollëpakët”. Më tej kreu i grupit parlamentar i LSI-së, shton se ky lloj promocioni është një aksham pazar.

“Ky shkollëpakëti, kryeministri ynë, bën promocion në gusht, në të dalë të sezonit turistik, pra bën një lloj aksham pazari. Aferim i qoftë, kaq di kaq bën!”