Aksidenti i Rakipit/ PDIU i përgjigjet ashpër PD, thirrje Prokurorisë

PDIU-ja reagon pas aksidentit të mëngjesit të sotëm, ku deputeti i saj, Aqif Rakipi u dorëzua në polici, duke pranuar se kishte aksidentuar me mjetin e tij një kalimtar në aksin rrugor Vorë-Tiranë.  PDIU-ja ka shprehur ngushëllimet familjes, ku edhe i bën thirrje Prokurorisë dhe Policisë të mos ndikohen politikisht për zbardhjen e ngjarjes. Ndërsa për deklaratën e PD-së, PDIU-ja e quan mjerim, pasi sipas saj po tenton të bëjë politike dhe opozitë me një aksident tragjik, ndërkohë që është ende në qeveri.

Deklarata e PDIU

PD, në mjerim, kërkon të bëjë politikë e opozitë me një aksident tragjik e nuk sheh që është ende në qeveri; është për të ardhur keq që përpiqet mjerisht të abuzojë me raste aksidentesh e fatkeqësish. PDIU i kërkon Prokurorisë dhe Policisë të mos ndikohet politikisht në zbardhjen e kësaj ngjarjeje tragjike. I shprehim ngushëllime familjes së të ndjerit për këtë fatkeqësi tragjike.