Dosja Top Channel trondit Apelin, kreu i gjykatës hetohet për manipulime

Çështja “Top Channel” ka shkaktuar një tërmet të vërtetë në Gjykatën e Apelit të Tiranës. Veprimet e gjykatësve të Apelit që pritet të marrin vendim për pronësinë e një prej televizioneve më të mëdha në vend, po hetohen nga prokurorët, pas ankesave të një prej palëve. Dyshimet se shorti i përzgjedhjes së gjyqtarëve është manpuluar ka shkaktuar përplasje fillimisht në sallën e gjyqit mes avokatëve dhe trupit gjykues.

Gjithçka nisi me zëvëndësimin e gjyqtares Zegjine Sollaku nga çështja e gjykimit të Top Channel.

Emri që do ta zëvëndësonte ishte paracaktuar dhe përflitej prej javësh, thonë avokatët. Përflitej se nga shorti do të dilte emri i Hysni Demirajt, kryetar i Gjykatës së Apelit të Tiranës. Dhe ashtu ndodhi.

Avokatët e njërës palë thonë se kanë prova të forta që provojnë se shorti është manipuluar dhe emri i Hysni Demirajt ka qenë i paracaktuar. Si kryetar i Gjykatës së Apelit, Hysni Demiraj ka edhe kontrollin e plotë mbi kompjuterin, ku hidhet shorti për gjykatësit, nga ku doli emri i tij. Pavarësisht kërkesave të vazhdueshme të avokatëve, praktikat e hedhjes së shortit nuk u vënë në dispozicion të palës që ka ankimuar procesin, duke shtuar dyshimet për manipulime.

Avokatët pretendojnë se manipulime kanë ndodhur edhe në shortin e përzgjedhjes së gjykatësit Fatri Islamaj që gjykoi kërkesën për largimin e Hysni Demirajt. Edhe në këtë rast emri i Fatri Islamajt ishte përfolur më parë dhe dyshimet ishin se gjithçka ishte e paracaktuar.

Pas këtyre dyshimeve, kompjuteri i punës së Kryetarit të Gjykatës së Apelit, Hysni Demirajt është kontrolluar nga prokurorë dhe oficerë të policisë gjyqësore ditët e fundit. Mësohet se një pjesë e materialeve në kompjuterin e tij është sekuestruar dhe po hetohet mënyra se si është hedhur shorti për çështjen në fjalë. Avokatët thanë se kanë prova të pakundërshtueshme për manipulimin e shortit të gjykatësve, sipas porosisë së njërës palë, ndërsa prokuroria pritet të verifikojë dyshimet e tyre dhe të nxjerrë të vërtetën për këtë skandal në Gjykatën e Apelit. (lapsi.al)