Rrëzimi i qeverive me çadra minorancash, është rrëzim i shtetit

0

Nga Zef Shtjefni/Një nga këto ditë po kaloja në bulevard pranë çadrës së Opozitës. Mu duk se pashë ca fytyra të njohura dhe thashë të hyj të shoh ç’bëhet aty. Kishte qenë radha e Lezhës dhe në fakt gjeta shumë shokë e miq të mi demokratë me të cilët filluam shpotitë. “Po ti, më pyetën mua me habi, ç’do këtu ?!”. E dinin shumë mirë se nuk kam lënë gjë pa shkruar nëpër gazeta kundër berishizmit. “Po thashë të hyj të pyes se kush ka vdekur, ua ktheva me shpoti”. “Ka vdekur Qeveria “Rama”, ma pritën ata rrufe”. “Qeveria Rama po freskohet, po shihni mos i kanë ardhur ditët Saliut”,- i thumbova prapë dhe vijova me ta bisedën për të kuptuar se çfarë vërtetë mendonin se do të arrinin me një grevë të tillë. Dhe them të vërtetën, pak shpresa vura re tek miqtë e mi demokratë për rrëzimin e Qeverisë me këtë çadër. Megjithatë, disa arritje mi numëruan ata: Një efekt e pat në shkundjen e Qeverisë nga kllapia, kur po kanabizohet gjithë vendi. Mbase kjo grevë edhe kriminelët do t’i trembë e mbaj larg politikës.

Mbase do ndikojë që të bëhen vërtetë zgjedhje të lira e korrekte kësaj here etj. Këto arritje të grevës më numëruan miqtë e mi demokratë lezhianë. Nuk mu duk se me thanë gjëra kot. Ndërsa në çadër atmosfera e asaj dite të bukur përzihej me atë të rrugës. Luhej shah e domino, këndohej e bëhej muhabet për shtat palë qejfe. Ndërkohë, vetëm pak gra e burra të tjerë rrinin në stola si të ngrysur dhe prisnin figurat e larta të PD-së për t’u ngritur e bërë detyrën e brohoritjeve të radhës. Çuditërisht në ato pak minuta që bisedova me demokratët lezhjanë vura re edhe disa nota realiste, për Qeverinë. “I duhen njohur disa merita,-më thanë ata: ndalimi i vjedhjeve të energjisë, reforma në arsim, forcimi i policisë rrugore, shtypja e rezistencës kriminale në Lazarat, reforma në drejtësi etj.

Por ama këmbëngulnin tek lazaratizimi i Shqipërisë, futja e kriminelëve në politikë, dështimi në luftën kundër korrupsionit, rritja e taksave e burokracive për biznesin etj. Këto mendime mu duken krejt tjetër gjë në krahasim me ato të lidershipit të PD, i cili vjen e shanë para mikrofonave e telekamerave, kërcënon e vjell vrerë, vë kushte e ultimatume për rrëzimin e Qeverisë, sa kujtdo që i sheh e dëgjon, ia mbushin mendjen më shumë se për çdo gjë tjetër, se këta e kanë mendjen thjeshtë tek ata zyra e karrige që kanë humbur sipër çadrës dhe aspak tek problemet që shqetësojnë vendin. Kush e analizon qeverisjen e tyre të fundit 8- vjeçare, nuk e ka të vështirë të kuptojë se krijuesit e mëdhenj të këtyre problemeve, për të cilat po pëllasin sot, janë vetë ata. Askush nga demokratët e thjeshtë nuk më tha se ka logjikë të rrëzohet Qeveria me këtë çadër. Sepse i bie që të mos ketë kurrë shtet në këmbë, nëse do t’i rrëzojmë qeveritë me çadrat e pakicës.

Edhe socialistët bënë çadër, me greve urie madje, por qeveria Berisha nuk ra edhe pse mashtroi gjithë ndërkombëtarët për marrëveshje me ta. Nuk ra edhe pse motivi i socialistëve ishte shumë më legjitim se i demokratëve sot. Këta janë në prag të zgjedhjeve dhe kërkojnë rrëzimin e qeverisë, pikërisht kur i kanë të gjitha mundësitë ta rrëzojnë atë me votë, siç u rrëzuan vetë nga pushteti në 2013. Është non sens kjo që po kërkojnë.

Nëse do të lejohet rrëzimi i një qeverie që ka një maxhorancë të tillë qeverisëse për tekat, për dëshirat e PD apo Saliut, ne rrezikojmë që vërtetë të mos bëjmë kurrë shtet në këtë vend, siç e kanë dëshiruar gjithnjë antishqiptarët. Berisha është kampion i vjedhjes e dhunimit të votës së lirë dhe ai nuk duhet të kishte fytyrë të dilte para shqiptarëve të flasë për votën e lirë. I takon veç të shporret dhe të mos e shohë më njeri. Nëse Basha kërkon të afirmohet dhe ka si qellim largimin e krimineleve që solli më parë Saliu e më pas edhe Rama në politikë, mendoj se ka të drejtë. Nëse Luli nuk dëshiron të shkojë në zgjedhje me komisione partiake, edhe për këtë ka të drejtë, por duhej ta provonte më parë në Parlament këtë betejë dhe nëse atje nuk arrinte gjë, le ta provonte me çadër.

Por mendoj se ka pak njerëz në këtë vend që nuk kuptojnë se pas gjithë kësaj zallamahie parazgjedhore është djallëzia dhe hipokrizia e Berishës për të sabotuar reformën në drejtësi,gjë të cilën e ka bërë me sistematikë të madhe që në zanafillë. Është qëllimi i tij për të sabotuar zgjedhjet e lira, të cilat i ka vrarë e vjedhur i pari vetë në 1996-ën e më pas disa herë të tjera me Ristanë e shejtanë.

Me sa duket ndjenë humbjen tjetër të madhe të PD nga vota e lirë dhe kësaj here i trembet fort. Testet janë bërë në dy bashki. Ndaj, Ai, si ujku mjegullën, do destabilitetin dhe anarkinë, pasi janë parajsa e pushtetit të këtij shtet-shkatërruesi të madh të shqiptarëve nga padija apo nga vetëdija. Për këto arsye mendoj se krijimi i një precedenti të tillë për rrëzimin e qeverive të ligjshme me çadra grevash të minorancave, është rrëzim i shtetit të shqiptarëve, gjë që nuk mund të lejohet. Çdo gjë tjetër mund të tolerohet a diskutohet, por jo cenimi i themeleve të sistemit demokratik.