Kryeministri Edi Rama: Nuk ka qeveri teknike. Në zgjedhje hyjmë dhe pa PD

0

Edhe pse këto ditë është folur për gjetjen e konsensusit mes mazhorancës dhe opozitës për daljen nga kriza politike, Kryeministri Edi Rama ka rrëzuar sot çdo mundësi për marrëvëshje. Bile përdori tonin e fortë dhe kërcënues se zgjedhjet do bëhen dhe se nuk do ketë qeveri teknike.

Në “Komunikimin javor” nga profili i tij “Facebook”, kreu i Qeverisë ka theksuar se vettingu do të realizohet. Rama u shpreh i bindur se PD-ja nuk do të bojkotojë as zgjedhjet edhe pse nuk sqaroi se si do të ndodhë kjo.

Nga ana tjetër, Kryeministri Rama është shprehur se është i gatshëm për dialog dhe ndryshime në Kodin Zgjedhor, nëse PD ka propozime konkrete.

“Nuk do të ketë as qeveri teknike dhe as shtyrje të zgjedhjeve”, kjo ka qenë deklarata e kryeministrit Rama në komunikimin javor duke theksuar se PD kërkon të fusë vendin në krizë politike.

“Sot do të flas për krizën false politike të nisur nga PD. Ajo kërkon të fusë vendin në krizë politike. S’ka për të ardhur ndonjëherë oferta për qeveri teknike. S’ka për të ardhur oferta për shtyrje të zgjedhjeve”, u shpreh Rama.

Ndër të tjera kryeministri Rama i bëri thirrje Partisë Demokratike që të kthehet në Parlament për të përmbyllur procesin e Vetting-ut. Një kërkesë që ka qenë në formën e këshillës, pasi sipas Ramës mos pjesëmarrja e PD në këtë proces do ta fundoste ende pa filluar fushata elektorale.
Kryeministri Rama është shprehur se është i gatshëm për dialog dhe ndryshime në Kodin Zgjedhor, nëse PD ka propozime konkrete.
“Një grup politikanësh që kërkojnë pushtet mblidhen te çadra. Po kështu janë një grup gjykatësish që nuk duan të ikë çadra, se kërkojnë të mbajnë peng drejtësinë. Të huaj jo dashamirës të këtij kombi, që nuk duan ta shohin Shqipërinë të bëjnë shtet. Kush ka hallin për një karrige parlamenti për vete, kush duket në çadër për të treguar se është akoma gjallë, e të tjerë për halle të tjera. Halle halle kjo dynja, halli hallit nuk i ngjan. Çadra e ngritur në mes të bulevardit si kështjellë rëre, S’ka për të ardhur ndonjëherë ftesa për qeveri të teknike, as oferta për shtyrje të zgjedhjeve. Të vetmit e atyre që presin atë që nuk vjen kurrë nga pritja në çadër, janë thashethemexhinjtë. Kjo nuk është kriza e Shqipërisë, por një krizë e një partie politike që nuk vjen dot në pushtet. Kjo është kriza e një katundi të izoluar politik. Kanë kapur peng të vërtetën. Është kriza e gogol-makutëve në orvatjen për t’i shpëtuar drejtësisë. Kjo është kriza e një elite politike të ngujuar në bulevardin e politikën, krejt të pavëmendshëm për shqetësimet e vërteta të popullit. Flasin për revolucion popullor pa popull”, tha ndër të tjera Rama.

E vetmja risi e komunikimit të Ramës ishte se në zgjedhje PS mund të hynte pa Partinë Demokratike. Një zhvillim ky që mund ta çojë tensionin dhe krizën politike drejt ekstremit.

Më këtë qëndrim të Kryeministrit, Qeverisë i ka negelur  vetëm të “shpikë” një opozitë të re. Duket se po shkojmë me vrap e me dëshirë drejt përplasjes se turmave.

VIDEO/Deklarata e plotë e Kryeministrit: