Pavarësia e Kosovës/Meta: Përulemi përpara Ibrahim Rugovës dhe heronjve të UÇK

Me rastin e 9-vjetorit të Pavarësisë së Kosovës,  kryeparlamentari Ilir Meta i ka përciellë një mesazh urimi homologut të tij në Kosovë Kadri Veseli.

Meta shpreh vlerësime të veçanta  për të gjithë ata që sakrifikuan dhe kontribuan në shpalljen e Pavarësisë.

Përgjatë letrës së tij Meta thekson  se sot duhet të përulemi përpara vizionit të ish-Presidentit të Kosovës Ibrahim Rugova dhe dëshmorëve  të  luftës për çlirimin e Kosovës.

Së fundmi kreu i Kuvendit, shpreh mbështetjen maksimale për Kosovën në emër të gjithë popullit dhe qeverisë shqiptare.

Letra e kreut të Kuvendit Ilir Meta:

 I nderuar Zoti Kryetar,

Me rastin e 9 vjetorit të pavarësisë së Republikës së Kosovës më lejoni t’Ju përcjell urimet më të përzemërta dhe më të ngrohta në emër të Kuvendit të Shqipërisë. Sot i gjithë kombi shqiptar kujton me mirënjohje të thellë të gjithë ata që sakrifikuan për pavarësinë e Kosovës, ndaj sot nderojmë me krenari, së bashku me të gjithë qytetarët e Kosovës, mençurinë vizionare të Presidentit Ibrahim Rrugova dhe përulemi me respekt të thellë ndaj heronjve të UÇK-së me Komandantin Adem Jashari në krye.

Sakrifica e pamasë e tyre na detyron të gjithëve të shumëfishojmë përpjekjet tona me qëllim që Shteti i Kosovës të ecë përpara në misionin kombëtar të shtimit të njohjeve ndërkombëtare, forcimit demokratik institucional dhe të avancimit në axhendën e sigurt euro-atlantike.

Në këtë drejtim, Ju siguroj për mbështetjen e plotë të Kuvendit të Shqipërisë, dhe duke mirëpritur vizitën Tuaj zyrtare ditën e hënë në Tiranë, unë besoj fort se ajo do të rikonfirmojë bashkëpunimin gjithnjë e më cilësor mes Tiranës dhe Prishtinës.

Duke Ju shprehur edhe një herë urimet e mia më të sinqerta, si dhe dëshirën për paqe, zhvillim e prosperitet për të gjithë qytetarët e Kosovës, Ju lutem pranoni, i nderuar Zoti Veseli, ndjenjat e konsideratës time më të lartë. 

Ilir META