Nis sot Java e 25-të e kampionatit italian

0

Java e 25-të e kampionatit italian të futbollit do të startojë mbrëmjen e sotme me takimin mes Juventusit dhe Palermos. Bardhezinjtë vijnë me petkun e skuadrës kryesuese dhe nuk pritet të kenë shumë vështirësi kundër ekipit siçilian. Trajneri Allegri nuk ka tw disponueshëm Mandzukic të skualifikuar dhe Chiellinin e Barzaglin të dëmtuar. Tekniku toskan mund të ndryshojë formulën vetëm për këtë ndeshje duke kaluar në një skemë me 3 mesfushorë dhe 1 lojtar pas dy sulmuesve. Më saktësisht në mesfushë do të jenë Khedira, Marchisio e Sturaro, kurse Pjanci do të jetë në mbështetje të dyshes ofensive, Higuain-Dybala.

Napoli pas disfatës në Ligën e Kampionëve kundër Realit të Madridit do të kërkojë të ringrihet në kampionat. “Të kaltrit”  do të përballen në “Bentegodi” me Chievon. Napoletanët nuk kanë probleme mungesash dhe ka gjasa që formacioni të jetë po ai që zbriti të mërkurën në “Bernabeu” pra me Zielinsik, Diawaran e Hamsik në mesfushë dhe me tredhëbëshin Callejon, Mertens, Insigne në repartin e avancuar. Sigurisht Elseid Hysaj do të jetë si gjithnjë titullar në të djathtë të mbrojtjes.

Interi do të sfidojë në transfertë Bolognën. Perisic është kthyer nga pezullimi, por jo Icardi, teksa i dëmtuar është Kondogbia. Nën skemën 4-4-2 pritet që Stefano Pioli t’ia besoj mesin e fushës 4-es Perisic, Galgliardini, Joao Mario  dhe Candreva. Sulmi zikaltër do të përbëhet nga Eder dhe Palacio.

Në “Olimpico” Roma e vendit të 2-të do të presë Torinon e Mihajlovic. Verdhekuqtë vijnë thuajse të plotë në këtë duel, me përjashtim të Florenzit. Spalletti nën modulin 3-4-2-1 do të rreshtojë në sulm Naingolan e Salah në mbështetje të Edin Dzekos.

Takimi ndoshta më i rëndësishëm i këtij raundi do të jetë ai të dielën në mbrëmje mes Milanit dhe Fiorentinës. Infermieria e kuqezinjve mbetet e tejmbushur. Më konkretisht jashtë për probleme fizike janë  Bonaventura, De Sciglio, Antonelli, Ronagnoli e Montolivo. Trajneri Montella ka gjasa të ndërtojë një mesfushë të përbërë nga  Juraj, Locatelli e Pasalic, kurse reparti ofensiv me shumë mundësi do të plotësohet nga Suso, Deulofeu dhe Ocampos, pra ekziston shansi që Bacca e Lapadula ta nisin nga stoli. Në krahun tjetër Paolo Sousa do të zbresë në fushë me 3-en sulmuese Valero, Kalinic dhe Ilicic. Një takim që pritet të ofrojë momente të veçanta.

Përsa i përket lojtarëve shqiptarë, Berisha do të jetë në formacion në takimin Atalanta-Crotone. Pavarësisht ndryshimit të trajnerit tek Pescara, ku u largua Oddo duke u zëvendësuar nga Zeman, sërish pritet që Memushaj të jetë titullar në sfidën Pescara-Genoa. Dëmtimi i Marchettit i ka hapur dyert Strakoshës që do të jete edhe një herë mes shtyllave në takimin Empoli-Lazio, për toskanët do ta nisë nga stoli Frederik Veseli.