Ç’pritet më 18 shkurt? Ristani: Protesta jo e dhunshme, por e fortë

0
Deputeti i PD, Arben Ristani, duke folur gjate nje mbledhje te Keshillit te Mandateve dhe Rregullores, ku eshte shqyrtuar kerkesa e PD per mbarimin e mandatit te deputetit socialist Rakip Suli./r/n/r/nLawmaker, Arben Ristani, speaks during a meeting of the Council of Mandates and Regulations.

Flet për “Koha Jonë”, Sekretari i Përgjithshëm i PD-së, Arben Ristani: Detajet e protestës janë surprizë

Intervistoi: Redjon Shtylla

Kur kanë mbetur edhe dy ditë nga protesta popullore e Partisë Demokratike, e thirrur prej saj në kryeqytet, për demokratët, suksesi për të cilën shqiptarët do bashkohen është i garantuar. Në një intervistë për “Koha Jonë”, sekretari i Përgjithshëm i PD-së, deputeti Arben Ristani, rrëfen për atë se çfarë do të ndodh më 18 shkurt. Ristani sqaron se, protesta nuk do jetë e dhunshme, por nuk mohon se do jetë e fortë. “Jemi të përgatitur që t’i shtrijmë protestat në të gjithë Shqipërinë po të jetë nevoja, si e vetmja rrugë që na ka mbetur për të mbrojtur demokracinë”. Edhe pse një protestë e thirrur nga PD-ja, Ristani thekson se, janë shqiptarët ata që do i thonë ndal çdo përpjekje aventureske për t’ua vjedhur demokracinë. Me riardhjen e PD-së në pushtet, opozitari premton se, bandat e krimit do shkërmoqen dhe shkojnë drejt burgut. E sa u takon prurje të reja në PD-në, për listat zgjedhore, sekretari i PD-së, tregohet diskret, por me thumb, shton se: “Në qoftë se do dëgjojë se sot një njeri i ndershëm, inteligjent dhe i përgjegjshëm, i bashkohet Ramës dhe bandës së tij, atëherë je përballë një surprize”.

Z.Ristani, në tre pika përmbledhëse, çfarë do kërkojë PD-ja në shesh më 18 shkurt?

Shqipëria është në ditët e saja më të zeza në këto 25 vitet e fundit. Në pushtet nuk kemi një qeveri normale, por një bandë kriminale që po zhvat Shqipërinë. Për shkak të keqqeverisjes, jemi vendi më i varfër në rajon dhe në Europë. Me të ardhurat më të ulëta për frymë, me papunësinë më të lartë, me emigracionin që konkurron vetëm me Sirinë në luftë, me taksat më të larta të rajonit, me mungesë investimesh të huaja, me Parlament të kriminalizuar, pushtetarë lokale të kriminalizuar, administratë të kriminalizuar dhe jo për krime do si do, por për vrasje, trafik droge dhe prostitucion, jemi cilësuar si Kolumbia e Europës për shkak të kanabizimit të Shqipërisë. Qeveria është e lidhur direkt me bandat e krimit, më të rrezikshmet prej të cilave, po i liron nga burgu ditë pas dite, ndërkohë që, ushtron dhunë ndaj të pamundurve duke i çuar edhe drejt vetëvrasjeve. Aktualisht jemi në prag të zgjedhjeve, të cilat janë mundësia më e mirë për popullin, që të heq qafe me votë të lirë këtë bandë gjakthithëse, por banda me krimin dhe paratë e pista të drogës dhe korrupsioni nuk do të lejojë zgjedhje të lira dhe të ndershme. Janë këto arsyet pse populli shqiptar ka vetëm rrugën e protestës për ti treguar qeverisë mosaprovimin dhe zemëratën ndaj keqqeverisjes dhe për të mbrojtur zgjedhjet e lira dhe të ndershme, si themel i demokracisë.

Si do të “shkarkohet” Kryeministri Rama?

Ramën dhe bandën e tij do e shkarkojnë shqiptarët me votë në 18 qershor.

Nga selia blu, por edhe aleatë të PD-së, flasin me tone të forta, herë edhe për një protestë të dhunshme? Cili është skenari për 18 shkurtin?

Askush nuk ka folur për protesta të dhunshme, as PD-ja dhe as aleatët e saj. Të gjithë jemi të përgatitur për protesta masive, të forta, të vendosura, për aq kohë sa të nevojitet, për të marrë garancitë e duhura për zgjedhje të lira dhe të ndershme. Jemi të përgatitur që t’i shtrijmë protestat në të gjithë Shqipërinë po të jetë nevoja, si e vetmja rrugë që na ka mbetur për të mbrojtur demokracinë.

Protesta nga ana tjetër, a është një testim për vetë PD-në dhe imazhin e saj? Sa rrezik ka që protesta të kthehet në një boomerang ndaj vetë PD-së?

Imazhi i PD-së ka 25 vjet që formësohet, me të mirat dhe të metat e saj. Të ndërgjegjshëm se të mrekullueshmen, të përsosurën e bën vetëm Zoti, por të bindur se të mirat PD-së i peshojnë më shumë se gabimet, me angazhimin e liderit të ri z. Basha, me ide të reja dhe energji të koncentruara, me orientim drejt punës dhe dashurisë për njerëzit, veprimtaritë e PD-së, aksionet e saja, protestat e udhëhequra prej saj dhe kryetarit Basha, kanë vetëm një përfundim të sigurt, suksesin.

Të rinjtë e PD-së, thuhet se do të ngrenë çadra dhe do rrethojnë Kryeministrinë për ditë me radhë deri në rrëzimin e qeverisë? Si qëndron e vërteta?

Detajet e protestës do ruajnë efektin e tyre surprizë si element garantues i suksesit. Vullnetin për sukses tashmë e dini.

Pritshmëritë e opozitës janë të larta për protestën, por nëse nuk arrihet objektivi, a rrezikon PD-ja që në zgjedhje të mos dalë fituese?

Pritshmëritë e opozitës janë vërtet të larta, sepse situata që po kalojmë i dikton këto pritshmëri. Njerëzve po ju shkon thika në kockë dhe revolta ka kohë që zien. Ne na duhet vetëm ta organizojmë dhe ta kanalizojmë drejt arritjes së qëllimit. Strukturat e PD-së po punojnë çdo ditë në funksion të protestës dhe nuk ka asnjë mundësi që objektivi të mos arrihet. Me objektiv në fakt nuk nënkuptoj vetëm protestën e të shtunës, por objektivi i PD-së dhe opozitës së bashkuar janë zgjedhjet e lira dhe të ndershme. Në luftën për zgjedhje të lira dhe të ndershme, në luftën për demokraci, për ta bërë vërtet Shqipërinë si gjithë Europa, PD-ja nuk ka asnjë mundësi për të mos dalë fituese. Janë shqiptarët ata që e kanë marrë këtë vendim kur rrëzuan diktaturën. Janë shqiptarët ata që do i thonë ndal çdo përpjekje aventureske për tua vjedhur demokracinë.

Duke folur për zgjedhjet, a po krijon PD-ja atmosferë te anëtarësia, organizimi, e mbi të gjitha frymë e besim për të fituar më 18 qershor?

PD-ja, është një parti e madhe, një parti që i ka dhënë tonin jetës së vendit gjatë këtyre viteve post komunizëm. PD-ja është një parti që ka akumuluar përvojë dhe ka ndërthurur më së miri përvojën me energjinë e re. PD-ja ka një lider të ri, plot energji dhe dije perëndimore. PD-ja ka një program për zhvillimin e vendit të hartuar nga specialistët e sajë më të mirë dhe në bashkëpunim me partnerët tanë euroatlantik. PD po zgjedh figurat e saj përfaqësuese me një konsultim të gjerë me anëtarësinë. Këto dhe shumë elementë të tjerë, kanë krijuar dhe do vazhdojnë të ngrenë në nivelet e duhura, frymën e fitores.

Si ju përgjigjeni akuzave se PD-ja në këto zgjedhje do përdor bandat për të fituar?

Hera e parë që e dëgjoj diçka të tillë. Në PD dhe nga njerëzit e PD-së, flitet vetëm për punë të ndershme dhe për dashuri për njerëzit. PD-ja është me plot kuptimin e fjalës, Parti Demokratike që përdor forma dhe metoda demokratike në punën e saj. Kur PD-ja të rivijë në pushtet, të gjithë do kenë mundësinë të rishohin se si bandat e krimit do shkërmoqen dhe shkojnë drejt burgut. Lirimi i tyre prej Ramës dhe të vetëve është i përkohshëm. Krimi dhe kriminelët e kanë vendin në burg, herët apo vonë, të mbështetur nga Rama apo kushdo si Rama.

Z.Ristani, si do të rifreskohet PD-ja deri në zgjedhje? Mund të na zbuloni ndonjë emër surprizë që i bashkohet PD-së?

PD është në një proces të vazhdueshëm hapje dhe rifreskimi. Të jesh sot me PD, të punosh në strukturat e saj, është natyrshmëri e njerëzve të ndershëm dhe të përgjegjshëm të këtij vendi dhe njerëz të tillë nuk janë surprizë. Në qoftë se do dëgjojë se sot një njeri i ndershëm, inteligjent dhe i përgjegjshëm, i bashkohet Ramës dhe bandës së tij, atëherë je përballë një surprize.

Në aspektin juridik, sa janë realisht premisat e ndryshimeve thelbësore në Kodin Elektoral, në mënyrë që ai të zgjidhë dhe shqetësimet e ekspertëve të OSBE/ODIHR-it? Si mund të arrihet votimi elektronik me marrëveshje?

Rama dhe rilindja e tij janë të painteresuara për të pasur një legjislacion që garanton zgjedhje të lira dhe të ndershme. I ndërgjegjshëm që nuk mund të fitojë në mënyrë demokratike, Rama ka të vetmen armë, të frikësojë dhe shantazhojë, të blejë votën e të pamundurve. Rekomandimet e OSBE-ODIHR, janë bërë publike menjëherë pas zgjedhjeve të vitit 2013, ka tashmë 3 vjet që Rama dhe të vetët s’kanë lëvizur as gishtin për t’i pasqyruar në legjislacionin zgjedhor. PD-ja dhe platforma e saj për ndryshimet që nevojiten në Kodin Zgjedhor, i ka publikuar që një vit më parë, por edhe për ato nuk ka pasur vullnet për t’i marrë në shqyrtim. Votimi elektronik është plotësisht i mundur nëse ka vullnet për ta realizuar. Shembuj dhe praktika të tilla bota ka plot, mjafton t’ju kujtoj se Brazili p.sh. ka mbi 10 vjet që voton me elektronikë dhe indigjenet atje përdorin me sukses elektronikën në votim. Shkurt dhe troç, s’ka vullnet për zgjedhje të lira dhe të ndershme.

Kur flitet kaq shumë për votim e numërim elektronik, por kur vota blihet para e jo gjatë votimit, si mund ta parandalojë votimi elektronik këtë fenomen që siç PD-ja thekson, po rrezikon zgjedhjet?

Qëllimi është zgjedhje të lira dhe të ndershme, votimi elektronik është një nga mjetet kryesore. Votimi elektronik zhduk shumë nga format e manipulimit zgjedhor, por sigurisht jo 100% të tyre. Veto-ja e rilindësve në komisionin e reformës zgjedhore, kundër votimit elektronik, ishte tregues i qartë dhe i hapur i mungesës së vullnetit për të mos bërë asgjë për të shmangur manipulimin zgjedhor.

Kryeministri Rama, është shprehur se i fiton zgjedhjet dhe plotëson numrin 71. Pyetja për ju z.Ristani, është se a do arrijë opozita e vetme, pa një koalicion me LSI-në, në numrin magjik 71 deputetë e të krijojë maxhorancën e re?

Partia Demokratike ka fituar zgjedhjet dhe ka drejtuar vendin në gjysmën e kohës në 25 vitet e fundit. Kjo është mënyra si funksionon demokracia. Ne jemi në opozitë, në një front opozitar sot edhe me parti të tjera, ku të gjithë së bashku, garën e kemi me partitë që përbejnë shumicën sot në pushtet. Shumica në pushtet sigurisht edhe me LSI brenda, është plotësisht përgjegjëse për gjendjen e rëndë ku është vendi. Opozita e bashkuar ka alternativën qeverisëse që synon të nxjerrë vendin nga bataku ku e kanë futur Rama dhe Meta. Alternativë kjo që është sigurisht në garë me alternativën zhvatëse dhe grabitëse të mazhorancës pushtetmbajtëse. Shqiptarët, jam i sigurt që duan ta heqin qafe, një orë e më parë, dhunën, mashtrimin, talljen ndaj njerëzve të thjeshtë dhe në hall, grabitjen e pasurisë së tyre, që janë karakteristikat kryesore të kësaj maxhorance, për t’i hapur rrugë alternativës së punës dhe dashurisë për njerëzit që ofron PD-ja dhe opozita e bashkuar. E keqja, s’mund të përbëjë kurrë shumicë.

Z.Basha gjatë pjesëmarrjes në inaugurimin e z.Trump, deklaroi se, SHBA nuk e mbështet Ramën. Por çfarë mund të përfitojë PD nga Presidenca Trump, vetëm kredite qofshin ato elektorale?

PD-ja, Shqipëria dhe çdo vend tjetër, presin nga Presidenca Trump, thellimin e mbështetjes për respektimin e rregullave demokratike të zhvillimit shoqëror dhe luftën pa kompromis kundër të keqes, mashtrimit, zhvatjes së popullit nga oligarkë të lidhur me krimin.

Do të jenë aleatët e PD-së, në listën e partisë?

Ky është një vendim që i përket strukturave kolegjiale dhe drejtuese të PD, pas shqyrtimit të hollësishëm të taktikave elektorale me aleatët.

E zgjedh ky Parlament presidentin e ri?

Sipas Kushtetutës po, por banda s’pyet për Kushtetutë dhe mund të bëjë çdo gjë po nuk u ndal në zullumin e saj.