Bregu: Bordi i ONM nuk shkel Kushtetutën

Kryetarja e Komisionit te Integrimit, Majlinda Bregu, mendon se nuk ka asgjë të paligjshme me bordin e ngritur për Operacionin Ndërkombëtar të Monitorimit.

Në një intervistë për Zërin e Amerikës, deputetja demokrate theksoi se duhet t’u jemi mirënjohës SHBA-ve dhe BE-së për ndërmjetësimin dhe ndihmën që kanë dhënë e po japin për reformën në drejtësi.

Zonja Bregu theksoi se kjo është hera e parë që rekomandimet e dhëna nga OSBE-ODIHRI për përmirësimin e standardeve zgjedhore, nuk po vihen në zbatim në Shqipëri.

Ne qëndrimin e saj, deputetja demokrate theksoi se mazhoranca duhet të japë garanci se nuk do të preken zgjedhjet.

Deputetja e Partisë Demokratike, ka thumbuar sërish kryetarin e PD-së, Lulzim Basha, kësaj herë për protestën e 18 shkurtit.

Bregu ndoshta nuk ka besim tek ajo që do arrijë protesta, ndaj edhe thotë: Uroj që protesta të mos mbarojë në datë 18, po të ngrejë çështje që qytetarët i kanë paraprirë edhe më mirë se opozita”.

Deputetja komentoi edhe ndër të tjera akuzuat që i janë bërë ambasadorit të SHBA-ve Donald Lu, në punët e brendshme të institucioneve shqiptare, siç ishte rasti i Kryeprokurorit Adriatik Llalla i cili deklaroi publikisht se ndjehej i shantazhuar prej tij.

“Unë mendoj se ambasadorët e huaj janë shumë të përfshirë në çështjet tona se i kemi lënë ne, pasi kemi dyshime tek njeri-tjetri dhe mungesë konsensusi. Kjo i lë vend edhe hapësirë atyre. I kemi konsideruar gjithnjë si ndërmjetës për të na bërë të flasim me njëri-tjetrin. Pastaj këto filmat me diversantë dhe që na duan të keqen nuk i besoj”,- tha Bregu duke lënë të nënkuptohet se ndërhyrja e një diplomati të huaj duhet të jetë më e vogël, në punët e brendshme të një vendi.

Deputetja ngriti edhe shqetësimin e zgjedhjeve, kur tha se “qeveria nuk e ka vënë ujin në zjarr për zbatimin e rekomandimeve të OSBE/ODIHR”. Sipas saj, i takon qeverisë të japë garanci që nuk do preket vota e shqiptarëve.