Ngjela: Tani Saliu nuk mbijeton dot më në politikë

Avokati Spartak Ngjela shprehet se me miratimin e ligjit të Vetingut fronti kundër reformës nuk ka më mundësi që ta bllokojë procesin. Ai shprehet se reforma e bënë të pamundur edhe mbijetesën e Sali Berishës në politikë.

Më poshtë komenti i plotë i Avokat Ngjelës në Facebook:

Pse vazhduan një rezistencë aq të gjatë kundër Amerikës një grusht njerëzish të korruptuar në Shqipëri?

Arsyeja kryesore nuk ishte politike por proceduriale: “Ta zvarrisim sa më gjatë procesin e Reformës, se “kush e di se çfarë ndodh”. Ky ishte intencioni kryesor.

Pastaj vijnë me radhë: Që të mos tremben gjyqtarët e të japin dorëheqjen;

Që të tregojë se Saliu eshtë i fortë, dhe mund të inkurajojë një lëvizje popullore antiamerikane, pa e thënë këtë, por që kuptohet nga falangat e tij antiperëndinore që i ka pasur gjithmonë pranë vetes

Që të tregonte te fqinjët, ku ai shet interesin kombëtar, se ka shumë mbështetës në Shqipëri dhe mund të bëjë kryengritje “popullore”, për ndërrimin e pushteteve.

Që të mbajë radhët e PD-së jashtë fluksit perëndimor në Kryesi të Partisë së tij, dhe të garantojë Lulzim Bashën në krye të partisë, jo për të fituar zgjedhjet por për të garantuar mbijetesën Berisha..

Tani, të gjitha këto u shkrinë si kripa në ujë. Por a do të kerë realisht një mbijetesë Berisha në politikën shqiptare?  Kjo është pamundësi absolute. Çfarë do të bëjë Saliu?

Asgjë të veçantë. Nuk ka më akt politik, se mendoi të mundte politikën amerikane me procedurë, me anë të disa individëve që nuk artikulohen dot as politikisht e as juridikisht. A e dini kush është individi më mjeran në qytetërimin perëndimor? Ai që nuk e ka aftësinë intelektive për t’u artikuluar”.