Në ora 15.30 mbërrijnë në Rinas heronjtë e Kombëtares së Futbollit

Kombëtarja e Shqipërisë e mbylli sot (dje) përvojën e saj mbresëlënëse në Euro 2016. Barazimi i Portugalisë na la jashtë këtij kompeticioni duke bërë që Shqipëria të kthehet në atdhe.

Lajmin për kthimin e kombëtares sot në orën 15:30 e dha vetë dje Kryeministri Edi Rama i cili gjithashtu ftoi të gjithë të presin “heronjtë tanë kombëtarë”

Plani i pritjes:

Ne 15.30 ekipi kombetar vjen ne aeroport (Rinas)

Nga kryeministria per pritjen e kombetares ka kete organizim

1- pritja ne aeroport (ceremoni mireseardhjeje

2- nisja nga aeroporti drejt Tiranes

3- ceremonia e dhenies se celesit ne Bashkine e Tiranes

4- Ministria e Jashtme, procedurat per pasaporta diplomatike

5- Kryeministri, pritja ne COD

6- Fan Zone (stacioni i fundit i ceremonialit per kombetaren)

De Biazi: Ne luajtëm të dielën, të tjerët i përshtatën rezultatet!

Xhani De Biazi ka dyshime se skuadrat e tjera të Euro 2016 I përshtatën rezultatet në varësi të llogarive të kualifikimit. Kështu do të kishte bërë edhe Shqipëria, në rast se nuk do të kishte luajtur të dielën. Dita në të cilën luajtëm thotë De Biazi ishte një aspect negative sepse ne nuk dinim rezultatet e tjera, gjatë një interviste për Supersport.

De Biazi a do të vazhdoni të jeni pjesë e rrugëtimit të kombëtares shqiptare?

Kam një kontratë me Federatën deri në 2017, ndaj mendoj se në kualifikueset e Botërorit tjetër do të jem trajneri i Shqipërisë, përveçse në rast se presidenti e mendon ndryshe.

Meritoni duartrokitje për atë që keni dhënë në turne…

Më shumë i meritojnë djemtë që kanë çuditur të gjithë në këtë turne dhe mendoj se gjëja më e bukur është se skuadra del me kokën lart nga një turne i rëndësishëm. Ka keqardhje nga të gjithë që nuk mundëm të vazhdonim. Bëmë aq shumë tifo për të tjerët që të vinin rezultatet që na nevojiteshin, por nuk ndodhi kështu. Largohemi gjithsesi me kokën lart dhe me bindjen se kemi dhënë gjithçka. Fakti që ne kemi luajtur të dielën ishte një aspekt negativ, pasi të tjerët mundën të përshtatnin rezultatet që kishin dalë nga fusha dhe kush luajti sot apo dje, kishte avantazhe në krahasim me ne.

Lorik Cana ka vendosur të largohet nga Kombëtarja dhe në këto momente kujtohet momenti kur i komunikuat që nuk do të luante ndaj Rumanisë…

Loriku në këtë Europian na ka dhënë një shembull të rëndësishëm që nëse do të jesh një njeri për skuadrën, duhet të jesh një person bujar që di të vërë interesat e skuadrës para interesave personal. Unë e di se sa dëshirë kishte ai që të luante ndeshjen e fundit kundër Rumanisë, pas skualifikimit në ndeshjen që për të do të thoshte shumë, kundër Francës. Ai ishte shumë pozitiv, gjithmonë aty për t’i dhënë një dorë shokëve. Dhe kur në mëngjesin e ndeshjes kundër Rumanisë i komunikova që nuk do të kishte luajtur, mendoj se ai ishte një reagim prej një personi të madh aq sa pastaj munda t’ia referoja grupit në mbledhje para ndeshjes. Mendoj se ishte një leksion shumë i rëndësishëm që ua la djemve më të rinj se ai, që kanë bërë më pak se ai, por që kanë më shumë pretendime.

A keni ndonjë peng nga kjo paraqitje?

Nuk kam peng, vetëm që nuk morëm rezultate që mund t’i bënim si ndaj Zvicrës, ashtu edhe ndaj Francës, nëse do të kishim pasur pak më shumë cinizëm në momente të caktuara të ndeshjes. Jemi ndoshta shumë jo ekspertë, në fushë duhet të jemi më të aftë të lexojmë disa momente të ndeshjes në të cilat mund të ngadalësosh lojën, në të cilat mund të kërkosh një faull, të mundohesh të fitosh kohë, këto aspekte që bëjnë pjesë te zgjuarsitë e dinakëritë e një lojtari ekspert. Ne kemi një skuadër relativisht të re dhe qartësisht që në këto nivele konkurrimi është shumë i lartë, ka skuadra të një niveli të lartë dhe lojtarë të mësuar të luajnë në kompeticione të nivelit të lartë.

E mendonit një paraqitje të tillë në Francë?

Në vigjilje të turneut nuk e mendoja këtë paraqitje. E dija që Franca luante në shtëpi dhe ishte e vështirë të siguronim rezultat ndaj tyre, edhe pse në të vërtetë në fushë do ta kishim merituar. Zvicra ka më shumë cilësi se ne në këto momente, edhe pse në 10 kundër 11 nuk e tregoi. Rumania është një skuadër në rritje që ndaj nesh ndeshi në vështirësi, mendoj se kemi pikët që meritonim. Por një pikë mes Zvicrës dhe Francës do të na kishte mundësuar të shkonim para dhe mendoj se do ta kishim merituar, pasi siç thashë në fillim, skuadra në nivel paraqitjeje ka qenë shumë mirë. Nuk kemi bërë asnjëherë tre paraqitje kaq të mira si skuadër edhe në kualifikueset për të ardhur këtu.

Tani puna vazhdon në shtator. Cilat janë mundësitë e Shqipërisë në eliminatore?

Unë mendoj se nëse ne vëmë veten në të njëjtin nivel si Spanja e Italia, e nisim me këmbën e gabuar. Mendoj se ato kanë vlera teknike më të mëdha, kanë një histori kombëtaresh shumë më të rëndësishme se e Shqipërisë. E dimë që ndoshta jemi skuadra e tretë në grupin kualifikues, shpresojmë të jemi të tretët nga pikëpamja cilësore. Pastaj diferencën e bën se si në fushë do të arrijmë të bëjmë ndeshjet, nëse kujtohemi se çfarë na mundësoi të vijmë deri në këto nivele. Unë mendoj se ishte kohezioni i grupit, dëshira për të çuditur dhe dëshira për të menduar se nuk kemi arritur, por se jemi ende në stacionin e parë të rrugëtimit tonë.

Skuadra ka vështirësi në fazën ofensive. A po punohet në këtë aspekt me të dhe për të ndryshuar skemë loje?

Mund të luaj edhe me 3-4 sulmues, siç bëmë kundër Ukrainës dhe pastaj pësojmë 3 gola. Luajmë me atë që hedhim në fushë dhe mendoj se skuadrat jetojnë mbi ekuilibra të hollë që duhen marrë shumë në konsideratë. Mua do të më pëlqente të luaja me tre sulmues të mirëfilltë, por do të na duhej të luanim me tre mesfushorë të një tipi të veçantë, katër mbrojtës të një tipi. Do të studiojmë sisteme të reja loje gjatë kësaj periudhe, shpresojmë që të kemi kohën për t’i përgatitur. Por mendoj se duhet të nisemi nga siguritë që kemi marrë nga ky edicon, edhe pse ne e kemi mendjen shumë dinamike dhe mendojmë gjithmonë si të përmirësojmë situatën.