Ja situata e përmbytjeve sipas ministrisë së Brendshme

Njihuni me situatën e reshjeve sipas Ministrisë së Punëve të Brendshme, e cila jep shifrat për qarqet më të prekura:

 

QARKU TIRANË

Në aksin rrugor Tiranë – Elbasan, pranë hotel “Eklips” ka një rrëshqitje masivi dheu. Aktualisht qarkullimi kryhet me vështirësi nën monitorimin e Policisë Rrugore.

p15

Një urë e vogël që lidh ish-Uzinën ”Dinamo” me Paskuqanin është dëmtuar dhe është ndërprerë qarkullimi i automjeteve në këtë drejtim.

Në Bërzhitë ka një rrëshqitje toke, e cila rrezikonte 4 familje. Emergjencat kanë bërë evakuuimin e tyre dhe kanë nisur ndërhyrjen me mjete për normalizimin e situatës.

p6

QARKU FIER

Në këtë qark nuk ka probleme shqetësuese me rreshjet. Lumi Gjanica dhe lumi Vjosa janë brenda parametrave. Ka prezencë uji vetëm në Njësinë Administrative Mbrostar.

Në zonën e Mallakastrës ka reshje të dendura shiu, lumi Seman ka filluar të dalë nga shtrati, por pa sjell shqetësime. Shtabi i Emergjencave në Prefekturë si dhe në Bashkinë Fier janë duke monitoruar situatën.

p2

N/PREFEKTURA LUSHNJË

Në orët e paradites është çarë argjinatura e lumit Shkumbin, pranë fshatit Çermë dhe strukturat e emergjencave u kanë bërë thirrje banorëve të largohen nga banesat që preken nga përmbytjet.

Si pasojë e rritjes së nivelit të prurjeve në lumin Shkumbin ka përmbytje në disa fshatra në Bashkinë e  Divjakës. Shtabi i Emergjencave në bashkëpunim me  forcat e Policisë së Lushnjës kanë evakuuar rreth 30 familje dhe kanë lajmëruar banorët të largohen nga banesat më të rrezikuara.

Në Bashkinë Rrogozhinë ka përmbytje si pasojë e daljes së lumit Shkumbin nga shtrati. Aktualisht janë marrë masat për evakuuimin e banorëve, në zonat më të prekura.

QARKU BERAT

Në këtë qark nuk ka probleme shqetësuese me rreshjet, po monitorohen prurjet e lumit Devoll në Bashkinë Ura Vajgurore dhe në disa Njësi Administrative. Ka prezencë uji në një sipërfaqe rreth 15 ha tokë në dy krahët e lumit Devoll.

QARKU  LEZHË

p3

Situata në fshatin Pllane, njësia administrative Zejmen, Bashkia Lezhë mëngjesin e sotëm është normalizuar dhe nuk paraqet probleme.

Në fshatin fshatin Fushë Kuqe, njësia administrative Fushë Kuqe, Bashkia Laç, ka pasur prezencë uji në sipërfaqe toke bujqësore si pasojë e reshjeve të rëna ditën e djeshme, por nuk raportohet për dëme materiale.

Qarkullimi në Rrugën e Kombit është normal në gjithë gjatësinë e aksit.

Aksi rrugor Pllane – Zejmen – Lezhë kalohet me vështirësi nga automjetet e vogla për shkak të dherave, të cilat kanë rënë në rrugë nga prurjet e përroit.

Nga prurjet e lumit Mat ka mbushje të liqenit të Shkopetit dhe për këtë arsye janë hapur portat dhe shkarkohet deri në 600 metër3/sek. nga hidrocentrali i Shkopetit, por kjo nuk krijon probleme.

p12

QARKU DURRËS

Gjatë ditës së djeshme në Bashkinë Shijak dhe në njësinë administrative Sukth, ka pasur vërshime të ujrave të lumit Erzen. Është punuar gjatë gjithë natës nga forcat e Policisë, të ushtrisë, forcat vullnetare me motorbarka dhe gomone për të bërë të mundur evakuuimin e banorëve që rrezikoheshin në banesat e tyre. Në   Bashkinë Shijak janë evakuuar rreth 50 familje.

Në njësinë administrative Sukth janë evakuuar rreth 30 familje dhe vazhdon evakuuimi i familjeve të tjera.

Shtabet e emergjencës së Prefekturës dhe të Bashkive Durrës dhe Shijak, po punojnë me gjitha strukturat.

p7

QARKU DIBËR

Ditën e djeshme në fshatin Gjoricë e Poshtme të bashkisë Bulqizë u rrezikua të çahej argjinatura e lumit Drin. Pas një pune të gjatë situata është normalizuar. Në terren kanë qenë forcat e Policisë së Shtetit dhe Forcat e Armatosura.

Ditën e sotme prurjet e lumit Drin janë ulur dhe nuk paraqitet rrezikshmëri.

p11

 

Situata në Fushë Bulqizë është normalizuar pas ndërhyrjes  me   fadroma   për   pastrimin   e   kanaleve.

p1

QARKU SHKODËR

Në aksin rrugor Fierzë – Fushë Arrëz në fshatin Mishka është shembur një pjesë e këtij segmenti rrugor. Aktualisht është ndërprerë qarkullimi nga Policia Rrugore.

Aksi rrugor Pukë – Iballë është i kalueshëm me një kalim për shkak të rënies së inerteve.

Aksi rrugor Qafë Thore – Bogë – Theth është i pakalueshëm. Gjithashtu aksi Qafë Mali – Fierzë vazhdon të jetë i pakalueshëm dhe po punohet për normalizimin e situatës.

QARKU ELBASAN

Si pasojë e rrëshqitjes së një masivi të madh dheu, aksi rrugor Elbasan – Librazhd në vendin e quajtur Xibrakë tek ish-magazinat e Rezervave të Shtetit, u bllokua për rreth 1 orë. Pas ndërhyrjes me mjete të rënda u hap njëri krah i rrugës dhe kalimi kryhet nën mbikqyrjen e Policisë Rrugore.

p14

Aksi rrugor Gramsh – Elbasan është i pakalueshëm për shkak të shembjes së urës në vendin e quajtur “Pompa e Çekinit”, por po punohet intesivisht dhe brenda një kohe të shkurtër do të bëhet i mundur qarkullimi edhe në këtë rrrugë.

p9

Niveli i lumit Shkumbin është ulur dhe situata është drejt normalizimit.

Në rezervuarin e fshatit Mlizë, njësia administrative Shushicë, Bashkia Elbasan, niveli i ujit arriti në pikën maksimale, por pas një pune me motopompa situata u normalizua dhe nuk paraqet problematikë.

p4

Në fshatin Polis Valë, njësia administrative Shushicë, Bashkia Elbasan, është dëmtuar ura mbi përroin Gostimë për shkak të prurjeve të shumta të përroit. Kjo urë lidh fshatin Polis Valë me rrugën kombëtare.

Në hidrocentralet e kaskadës së Drinit dhe në hidrocentralet Ulëz dhe Shopet kanë filluar shkarkimet me rreth 600 m3/sek.

Nga qarqet e tjera të vendit nuk raportohen probleme për shkak të kushteve të motit

Emergjencat Civile u apelojnë qytetarëve të telefonojnë në numrin 129 të Policisë së Shtetit apo në numrin 128 të Shërbimit Zjarrfikës, për çdo rast emergjence apo situatë problematike.